“მთავარი არხის” დირექტორმა ნიკა გვარამიამ “ფეისბუქის” პირად გვერდზე, მსახიობისა და შოუმენის დემეტრე (დუტა) სხირტლაძესთან დაკავშირებით ირონიის შემცველი პოსტი გამოაქვეყნა. გვარამიას უკმაყოფილება გამოიწვია იმ ფაქტმა, რომ გუშინ ღამით განვითარებული მოვლენების ფონზე, სხირტლაძე ტელეკომპანია “იმედის” ეთერში “ცეკვავენ ვარსკვლავებს” უძღვებოდა.
“გაიცანით, დუტა სხირტლაძე.
2021 წლის 8 ნოემბერი – ტვ – “იმედზე” მიყავს “ცეკვავენ ვარსკვლავები”.
2007 წლის 8 ნოემბერი – “რუსთავი 2” -ზე მიყავდა “ჯეოსტარი”.
ის იგივეა, მარად და მარად”, – დაწერა გვარამიამ “ფეისბუქზე”.
ნიკა გვარამიას პოსტმა სოციალური ქსელის მომხმარებელში, არაერთგვაროვანი აზრი გამოიწვია, ზოგიერთმა მათგანმა “მთავარი არხის” დირექტორს აღნიშნული პოზიცია დაუწუნა.
გუშინ საღამოს, მიხეილ სააკაშვილი გლდანის #18 სამკურნალო დაწესებულებაში გადაიყვანეს. თითქმის ერთი საათის განმავლობაში უცნობი იყო თუ სად და რა ვითარებაში წაიყვანეს მიხეილ სააკაშვილი.
როგორც ექს-პრეზიდენტი ამბობს, ის გლდანის ციხეში მოტყუებით გადაიყვანეს. ეს ინფორმაცია პირველად სახალხო დამცველმა ნინო ლომჯარიამ გააჟღერა. პენიტენციური სამსახურის მიერ გავრცელებული კადრებიდანაც ჩანს, რომ სააკაშვილი თავისი ხელით ალაგებს პირად ნივთებს და ტოვებს დაწესებულებას.
იუსტიციის მინისტრის რატი ბრეგაძის განცხადებით, მიხეილ სააკაშვილმა უწყების თანამშრომლებს ფიზიკური და სიტყვიერი შეურაცხყოფა მიაყენა. რომლის თანახმადაც, სააკაშვილმა ასევე ძვირადღირებული სამედიცინო ტექნიკაც დააზიანა. ამ ფაქტს ბრეგაძის თქმით, გენერალური ინსპექცია სწავლობს, რაზეც შესაბამისი რეაგირება იქნება.