აშშ-ის პრეზიდენტი, დონალდ ტრამპი სოციალურ ქსელში წერს, რომ მას მსოფლიოში კონფლიქტების შეჩერებისა და მშვიდობის დამყარებისთვის ნობელის პრემიას არ მისცემენ, მიუხედავად იმისა, თუ რას აკეთებს.
„რუანდის და კონგოს წარმომადგენლები ვაშინგტონში ორშაბათს იქნებიან დოკუმენტებზე ხელმოსაწერად. ეს არის დიდი დღე აფრიკისთვის და, გულწრფელად გითხრათ, დიდი დღე მთელი მსოფლიოსთვის! მე არ მივიღებ ნობელის მშვიდობის პრემიას ამისთვის, მე არ მივიღებ ნობელის მშვიდობის პრემიას ინდოეთსა და პაკისტანს შორის ომის შეჩერებისთვის, მე არ მივიღებ ნობელის მშვიდობის პრემიას სერბეთსა და კოსოვოს შორის ომის შეჩერებისთვის, არ მივიღებ ნობელის მშვიდობის პრემიას ეგვიპტესა და ეთიოპიას შორის მშვიდობის შენარჩუნებისთვის; არ მივიღებ ნობელის მშვიდობის პრემიას ახლო აღმოსავლეთში აბრაამის შეთანხმებისთვის, რომელიც, ყველაფერი თუ კარგად წარიმართება, ბოლომდე გაივსება დამატებითი ქვეყნების ხელმოწერებით და პირველად საუკუნეების განმავლობაში გააერთიანებს ახლო აღმოსავლეთს! არა, მე არ მივიღებ ნობელის მშვიდობის პრემიას, განურჩევლად იმისა, რას ვაკეთებ, მათ შორის რუსეთ-უკრაინასა და ისრაელ-ირანთან დაკავშირებით, მიუხედავად იმისა, რა შედეგები იქნება, თუმცა ხალხმა იცის და ეს არის ჩემთვის მნიშვნელოვანი“, – წერს ტრამპი.