კრემლის პრესსპიკერმა დიმიტრი პესკოვმა Sky News-სთან ინტერვიუში ირან-ისრაელის კონფლიქტის შესახებ ისაუბრა.
მისი თქმით, აიათოლა ალი ხამენეის ლიკვიდაციის შემთხვევაში რუსეთი „ძალიან ნეგატიურ“ რეაგირებას მოახდენს, თუმცა მას არ დაუკონკრეტებია, რა შეიძლება იყოს ეს.
„სიტუაცია უკიდურესად დაძაბულია და სახიფათოა არა მხოლოდ რეგიონისთვის, არამედ გლობალურად. კონფლიქტის მონაწილეთა შემადგენლობის გაფართოება პოტენციურად კიდევ უფრო საშიშია. ეს მხოლოდ დაპირისპირების კიდევ ერთ წრეს და რეგიონში დაძაბულობის ესკალაციას გამოიწვევს. [ირანში რეჟიმის შეცვლა] წარმოუდგენელია. ეს მიუღებელი უნდა იყოს, ამაზე საუბარიც კი ყველასთვის მიუღებელი უნდა იყოს“, – აღნიშნა პესკოვმა.
ამასთან, პრესსპიკერმა თქვა, რომ აიათოლას ლიკვიდაცია ირანში ექსტრემისტული განწყობების გაჩენას გამოიწვევს.
„ეს ირანში ექსტრემისტული განწყობების გაჩენას გამოიწვევს და მათ, ვინც [ხამენეის მკვლელობაზე] საუბრობს, ეს უნდა გაითვალისწინონ. ისინი „პანდორას ყუთს“ გახსნიან“, – განაცხადა პესკოვმა.