თბილისის საქალაქო სასამართლოში „თანაინვესტირების ფონდის“ ყოფილი ხელმძღვანელის, გიოგი ბაჩიაშვილის პროცესი იმართება.
სიტყვით გამოსვლისას მან მოსამართლე ჯვებე ნაჭყებიას მიმართა.
„ჩემი ფეისბუქის გვერდზე როდესაც გამოქვეყნდა პოსტი ქვეყნის დატოვების შესახებ, ერთ დღეში ჩატარდა ყველა საგამოძიებო მოქმედება, რის შედეგადაც დააკავეს ბატონი ქარუმიძე. უამრავი ინფორმაცია გაცვალეს სხვადასხვა პროფილის წარმომადგენლებთან და შეიძლება ითქვას, კარგად იმუშავა შსს-მ.
ჩემი მოტაცების შემდეგ 3 კვირა გავიდა. 2 კვირა გავიდა, რაც თქვენ ამ დარბაზში მოგახსენეთ და მინდა გითხრათ, რომ არც ერთი მოქმედება არ ჩატარებულა, რის შესახებაც ჩვენ საქმის კურსში ვართ. მე არ ვარ ცნობილი დაზარალებულად, არავინ არ დაკითხულა ჩემ გარეშემო და არც მე. მაინტერესებს, რამე რეაგირება გააკეთა სასამართლომ ჩემს წინა განცხადებაზე თუ არა.
როდესაც საქმე ეხება მოქალაქეების თავისუფლებას, უფლებებს, რეაგირება რატომღაც არაა. როდესაც საქმე ეხება ბატონი ივანიშვილის ინტერესს, აგერ კაცის განზრახ მკვლელობაზე 10 წლიდან იწყება სასჯელი და მე ერთი კაცის ჩვენების გამო 11 წელი მაქვს მისჯილი.
ჩემს საქმეში იდო მხოლოდ და მხოლოდ ორი უტყუარი ინფორმაცია და ორივე იყო ჩემს სასარგებლოდ.
მაინტერესებს, რა რეაგირება გქონდათ და თქვენთვის ხომ არაა რამე ცნობილი ამის შესახებ?
მე როგორ უნდა ვენდო ამ სასამართლოს, რომელიც იმ სისტემის ნაწილია, რომელიც ამ ყველაფერს სჩადის?“, – მიმართა ბაჩიაშვილმა მოსამართლეს.