გიორგი გახარია არის ძალიან სერიოზული პოლიტიკური შანტაჟის ქვეშ. მის თავზე დამოკლეს მახვილი დაკიდეს, – ასე ეხმაურება ნაციონალური მოძრაობის“ წევრი, ლევან სანიკიძე გიორგი გახარიას პარლამენტის დროებით საგამოძიებო კომისიაზე მეორედ დაბარებას.
სანიკიძეს თქმით, გახარია პოლიტიკური შანტაჟის ქვეშაა.
[…]როდესაც ერთხელ წახვალ კომპრომისზე ბიძინა ივანიშვილთან, განსაკუთრებით ამ დროს, 26 ოქტომბრის შემდეგ, აბსოლუტურად ლოგიკურია, რომ მას მეორედაც კომპრომისზე წასვლას სთხოვენ. ჩვენს გუნდს საფუძვლიანი ეჭვი გვაქვს, რომ გიორგი გახარია არის ძალიან სერიოზული პოლიტიკური შანტაჟის ქვეშ. მის თავზე დამოკლეს მახვილი დაკიდეს ჩორჩანის ეპიზოდთან დაკავშირებით.
ქართულმა საზოგადოებამ მას [გიორგი გახარიას და მის გუნდს] საშუალება არ მისცა პარლამენტში შესვლასთან დაკავშირებით გადაწყვეტილება მიეღო ანუ მას [გიორგი გახარიას] ყურადღების გამახვილება საზოგადოებრივ აზრზე მოუწია (მე რამდენადაც ვიცი, მისი გუნდის საწინააღმდეგო გადაწყვეტილება მიიღო და პარლამენტში არ შევიდა). „ქართული ოცნებას“ [სურს] თავი დაიზღვიოს, რომ იგივე თვითმმართველობის არჩევნებთან დაკავშირებით არ მოხდება, არ არის გამორიცხული, რომ სწორედ ამ მიზნით ეს მიმდინარეობდეს.
მიუხედავად იმისა, რომ გახარიას გუნდი არავის მიმართ სოლიდარული არ არის და ყოველთვის ოლიმპოდან გველაპარაკება, ჩვენ ვაღიარებთ, რომ ეს ცალსახა პოლიტიკური დევნაა, თუმცა რას ემსახურება? – ჩვენ ვფიქრობთ, რომ თვითმმართველობის არჩევნებში მისი შესვლის გარანტირებას ემსახურება“, – განაცხადა სანიკიძემ.
შეგახსენებთ, 23 ივნისს პარლამენტში გამოკითხვაზე მეორედ დაიბარეს გიორგი გახარია. როგორც დროებითი საგამოძიებო კომისიის თავმჯდომარემ, თეა წულუკიანმა განმარტა, ის სხდომაზე ჩორჩანას საკითხთან დაკავშირებითაა დაბარებული, რათა დამატებით კითხვებს უპასუხოს.