„ვაშინგტონ პოსტის“ ცნობით, აშშ-ის პრეზიდენტის, დონალდ ტრამპის ადმინისტრაცია გეგმავს დაიწყოს შეერთებულ შტატებში არალეგალურად მყოფი ათასობით უცხოელის გადაყვანა აშშ-ის სამხედრო ბაზაზე გუანტანამოს ყურეში.
როგორც აღნიშნული მედია იუწყება, სხვა ქვეყნებთან ერთად, განიხილება ბრიტანეთის, იტალიის, საფრანგეთის, გერმანიის, ირლანდიის, ბელგიის, ნიდერლანდების, ლიტვის, პოლონეთის, თურქეთისა და უკრაინის მოქალაქეების გადაყვანა გუანტანამოს ყურეში.
როგორც ირკვევა, საუბარია საერთო ჯამში 9 000 ადამიანზე.
მზადება მოიცავს ამ ადამიანების სამედიცინო შემოწმებას, რათა დადგინდეს, არიან თუ არა ისინი საკმარისად ჯანმრთელები, რათა გაგზავნონ გუანტანამოში.
შეგახსენებთ, საიმიგრაციო სამსახურის ფედერალურ აგენტებსა და დემონსტრანტებს შორის კალიფორნიაში შეტაკებები მიმდინარეობს. არეულობა საიმიგრაციო სამსახურის მიერ უსაბუთო მიგრანტების წინააღმდეგ რეიდების ჩატარებას მოჰყვა. შეტაკებები ქალაქ ლოს ანჯელესში, ასევე მიმდებარე დასახლებებში – პარამაუნტსა და კომპტონში მოხდა. დემონსტრანტებმა სამართალდამცველებს „მოლოტოვის კოქტეილები“, ქვები და სხვადასხვა ნივთი ესროლეს. აქციის მონაწილეების დასაშლელად გამოიყენეს ცრემლსადენი აირი და რეზინის ხელკეტები.
ბოლო ორი დღის განმავლობაში დაკავებულია 400-მდე ადამიანი.
ტრამპმა ლოს ანჯელესში ეროვნული გვარდიის ორი ათასი წევრის განთავსების განკარგულება გასცა.
მან აღნიშნა, რომ საპროტესტო აქციებზე ნიღბების გამოყენება აიკრძალება.