საქართველოს მესამე პრეზიდენტი, მიხელ სააკაშვილი “ერთიანობა-ნაციონალური მოძრაობის” ლიდერის, თინა ბოკუჩავას დღევანდელ ბრიფინგს სასამართლო სხდომაზე ჩართვისას გამოეხმაურა და თქვა, რომ ის რაც მოუწყეს ბოკუჩავას ოჯახს, ეს რუსეთი აღარაა – ეს არის, კადიროვის ჩეჩნეთი.
სააკშვილის განცხადებით, ეს არის უკიდურესად მხდალი, უკიდურესად სუსტი რეჟიმის ქმედება.
“მინდა მივესალმო საამაყო, უმაგრეს თინათინ ბოკუჩავას, ერთიანი ნაციონალური მოძრაობის თავმჯდომარესა და უმაგრეს პოლიტიკურ ლიდერს.
ის რაც მოუწყეს მის [კოტე იოსელიანს] მეუღლეს და მის ოჯახს გუშინ, ეს აღარ არის რუსეთი – ჩვენ ვიძახით, რომ არ გვინდა რუსეთი საქართველოში – რუსეთი აღარ არის ეს, ეს არის კადიროვის ჩეჩნეთი!
კადიროვი იტაცებს ასე ხალხს, კადიროვი აწერინებს მათ ვიდეოებს, კადიროვი აშინებს მათ ოჯახის უსაფრთხოებით.
ამ ბანდიტებმა დაამკვიდრეს საქართველოში კადიროვიზმი – ყველაფერს აქვს თავის საზღვარი, ხალხო!
არ გვეშინია, არ გავჩუმდებით!
ეს არის უკიდურესად მხდალი, უკიდურესად სუსტი რეჟიმის ქმედება – ეს “დაჩმორების”, დაშინების მცდელობა – ერთუჯრედიანი, უინტელექტო, გაუნათლებელი ქონდრისკაცების მხრიდან.” – თქვა სააკაშვილმა.
შეგახსსენებთ, თინა ბოკუჩავამ დღეს გამართულ ბრიფინგზე მისი მეუღლის, კოტე იოსელიანის მიერ გავრცელებულ საბოდიშო ვიდეოზე ისაუბრა და განაცხადა, რომ ვიდეოს ჩაწერამდე მის მეუღლეს საცხოვრებელ სახლთან ჩაუსაფრდნენ და შემდეგ გაიტაცეს.
8 ივნისს, კოტე იოსელიანმა გაავრცელა ვიდეო, სადაც ის ბოდიშს უხდის უტა ივანიშვილს, 7 წლის წინ მის პერსონალურ ცხოვრებაზე გაკეთებული კომენტარის გამო, რომელზეც საჯარო ბოდიში ადრევე მოხდილი ჰქონდა.