„კოალიცია ცვლილებისთვის” ერთ-ერთი ლიდერის, ნიკა მელიას ადვოკატმა, ბექა კვინიკაძემ, რუსთავის მეთორმეტე პენიტენციურ დაწესებულებაში მელიას მონახულების შემდეგ, ახალ ბრალდებასთან დაკავშირებით, პოლიტიკოსის რეაქციის შესახებ ისაუბრა.
„მორიგ აბსურდულ ბრალს ნიკა ღიმილით შეხვდა. სიმართლე რომ გითხრათ, არც აინტერესებს, რამდენ აბსურდულ ბრალს წაუყენებს რეჟიმი მას, ამიტომ დიდხანს არც გვისაუბრია ამ საკითხთან დაკავშირებით.
ჩვენთვის უცნობია, როდის გადაწყვეტენ ისინი ბრალის წარდგენას. ერთ-ერთი რაც არის, ინფორმაციის ნაკლებობა აქვს, რადგან ამ მომენტისთვის, მას ჯერ კიდევ არ აქვს დამზადებული ბარათი და არც ტელევიზორის შეძენის შესაძლებლობა აქვს და არც სხვადასხვა ნივთის”, -აღნიშნა ადვოკატმა.
შეგახსენებთ, 30 მაისს გამართულ სასამართლო სხდომაზე მოსამართლე ირაკლი შვანგირაძისთვის წყლის შესხმის გამო, მელიას წინააღმდეგ გამოძიება დაიწყო.
შინაგან საქმეთა სამინისტროს ცნობით, გამოძიება სისხლის სამართლის კოდექსის 366-ე მუხლით დაიწყო, რაც სასამართლოს უპატივცემულობის გულისხმობს.
აღნიშნული მუხლი სასჯელის სახით ჯარიმას, საზოგადოებისთვის სასარგებლო შრომას ან 1 წლამდე თავისუფლების აღკვეთას ითვალისწინებს.
ნიკა მელია 29 მაისს, ადმინისტრაციული სამართალდარღვევის მოტივით, დააკავეს.
30 მაისს, საგამოძიებო კომისიაზე გამოუცხადებლობის გამო დაკისრებული გირაოს არგადახდის მიზეზით, მას პატიმრობა შეეფარდა.