გუშინ თანაინვესტირების ფონდის ყოფილი დირექტორის, ბიზნესმენ გიორგი ბაჩიაშვილის სასამართლო პროცესი გაიმართა.
სიტყვით გამოსვლისას ბაჩიაშვილმა თქვა: „ თვალები ამიხვიეს, 2 დღე თვალახვეული მატარეს, ჩამტენეს აირზენას თვითმფრინავში, ყველა კანონდარღვევით ჩამომიყვანეს საქართველოში“.
აღნიშნულს „ჯორჯიან ეარვეისი“ საგანგებო განცხადებით ეხმაურება.
„მაღალი საზოგადოებრივი ინტერესიდან და მედიასივრცეში გავრცელებული არასწორი ინფორმაციიდან გამომდინარე, გვსურს განვმარტოთ პროცედურები ჩარტერული რეისის შესრულებასთან დაკავშირებით. ნებისმიერი კერძო ან იურიდიული პირი, რომელსაც სურს ამა თუ იმ მიმართულებით ჩარტერული რეისის შეკვეთა, უკავშირდება ავიაკომპანიის კომერციულ დეპარტამენტს. დამკვეთი პირი თუ ორგანიზაცია ავიაკომპანიას აწვდის ინფორმაციას რეისის მიმართულების, სასურველი თარიღისა და დროის და თბილისიდან მგზავრების რაოდენობის და მათი მონაცემების შესახებ. შეთანხმების შემდეგ, წინასწარ ხდება რეისის ანაზღაურება. მგზავრს, რომელსაც აქვს შეკვეთილი და ანაზღაურებული ჩარტერული რეისი, აქვს უფლება უკანა გზაზე გამოამგზავროს მისთვის სასურველი პირი ან პირები. აღნიშნულთან დაკავშირებით ავიაკომპანიას ის ინფორმაციას არ უთანხმებს, რადგან ეს არის ჩარტერული რეისი, რომელიც სრულდება ამ კონკრეტული პიროვნების დაკვეთით. უკანა გზაზე გამოსამგზავრებელ პირებთან დაკავშირებით ყველა პროცედურა, მათ შორის, პირველ რიგში უსაფრთხოების საკითხები, არის საერთაშორისო აეროპორტის, საიდანაც სრულდება რეისი და აღნიშნულ აეროპორტში მოქმედი სამართალდამცავი ორგანოების პასუხისმგებლობა. თბილისში ჩამოსვლის შემდგომ, მგზავრები ყველა შესაბამის პროცედურას თბილისის საერთაშორისო აეროპორტში გადიან.
კიდევ ერთხელ ვაცხადებთ, რომ კერძო პირების ან ორგანიზაციების მიერ შეკვეთილი რეისების შესახებ ინფორმაცია წარმოადგენს პერსონალურ ინფორმაციას, რაც დაცულია კანონის მიერ და მისი გაცემის უფლება კომპანიას არ აქვს. „ჯორჯიან ეარვეისის” მენეჯმენტი სრული პასუხისმგებლობით აცხადებს, რომ ავიაკომპანიის მხრიდან არანაირ კანონდარღვევას ადგილი არ ჰქონია“, – აღნიშნულია განცხადებაში.
ამასთან, გუშინ BM.GE-მ გაავრცელა ინფორმაცია, რომლის მიხედვითაც, 26 მაისს აბუ-დაბიში GMT დროით 12:39-ზე, ანუ ადგილობრივი დროით 15:23-ზე დაეშვა “ჯორჯიან ეარვეისის” VIP ბორტი 4L-TGB, Bombardier CRJ, ბაჩიაშვილმა კი თქვა, რომ ის საქართველოში სწორედ “ჯორჯიან ეარვეისის” Bombardier-ის მეშვეობით ჩამოიყვანეს.