„ბათუმელებისა“ და „ნეტგაზეთის“ დაპატიმრებული დამფუძნებლის, მზია ამაღლობელის სასამართლო პროცესზე დაცვის მხარის მოწმე ქირურგი-იმპლანტოლოგი, თათია ანდღულაძე იკითხება.
მისი თქმით, სილის გაწვნის შემდეგ ირაკლი დგებუაძს არ აღენიშნებოდა ტკივილის ფიზიოლოგიური რეფლექსები, რაც შესაძლოა გამოხატულიყო მიმიკით ან მოძრაობით.
„სილის გაწვნის დროს რა ფიზიოლოგიური რეაქციები არსებობს? ეს არის მიმიკა და მოტორული რეაქცია ერთდროულად. ანუ თუ მე სახის არეში დამარტყამენ, ყველაზე მნიშვნელოვანი, რაც უნდა ყოფილიყო იმ წუთას გამომხატველი [ტკივილის] ეს არის, ტკივილის გამომხატველი გრიმასი, ანუ პაციენტს ხელი უნდა წაეღო მტკივნეულ ადგილას… ამ ვიდეოში რას ვხედავთ, მზიას ამ სილის გაწვნის შემდეგ, ბატონ ირაკლის მხოლოდ და მხოლოდ აღენიშნება ერთი რეაქცია – ეს არის თავდაცვა, თუ ხედავთ კადრში, უკან იხევა… ამ ვიდეოების მიხედვით პაციენტს არ აღენიშნება ფიზიოლოგიური რეფლექსები… თქვენ მე რომ ხელი დამარტყათ, თუ მეტკინა, აუცილებლად რაღაც დამეტყობა, ან მიმიკა, ან მოტორული რეაქცია ან სხვა ტიპის“, – თქვა თათია ანდღულაძემ.
შეგახსენებთ, მზია ამაღლობელი 2025 წლის 11 იანვარს დააკავეს. მას ბრალი სისხლის სამართლის კოდექსის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს. მას 4-დან 7 წლამდე პატიმრობა ემუქრება.
ბათუმის პოლიციის ხელმძღვანელის ირაკლი დგებუაძის თქმით, ამაღლობელის მიერ სილის გაწვნის შედეგად, მას ლოყისა და ყურის არეში სიწითლე აღენიშნებოდა.