საქართველოს მეხუთე პრეზიდენტმა, სალომე ზურაბიშვილმა ცოტა ხნის წინ ბრიფინგი გამართა.
ზურაბიშვილმა ბრიფინგი „ტვ პირველის“ ჟურნალისტზე, მარიამ მაკასარაშვილზე თავდასხმის შეფასებით დაიწყო.
„ეს არის პირდაპირ ქალების წინააღმდეგ, ქალ ჟურნალისტების თუ ქალ აქტივისტების წინააღმდეგ გამჟღავნებული ძალადობა ყველაზე სასტიკი ფორმებით. ეს არის გამჟღავნება და გამოხატულება იმისა, თუ რამდენად ბარბაროსული და ჩამორჩენილი გახდა რეჟიმი. ეს არის ნიშანი იმისი, რომ ცივილიზებული ფორმები დაკარგული აქვს. ცხადია, ეს მიუღებელია ჩვენი საზოგადოებისთვის, ტრადიციებისთვის.
დადიან ეკლესიაში, უჭირავთ უზარმაზარი სანთლები და ამ დროს, სრულიად უდანაშაულო ქალების წინააღმდეგ ასეთი ბარბაროსობა მიდის იმ კრიმინალებისგან, თუ მოკრიმინალო ელემენტებისგან, რომლებიც პირდაპირ არიან გაშვებული ქუჩებში. ეს არ არის მარტივი სიტუაცია. ეს არის ისეთი რამ, რაც შეიძლება ყველას მოუბრუნდეს ერთ დღეს, როდესაც ქვეყანა უმართავი ხდება“, – თქვა ზურაბიშვილმა.
შეგახსენებთ, მარიამ მაკასარაშვილის თქმით, მასზე ქვემო ქართლში სახელმწიფო რწმუნებულის ყოფილი პირველი მოადგილის, გიორგი შინჯიკაშვილის მამამ იძალადა.