გუშინდელი აქციის ერთ-ერთი მონაწილე დემონსტრაციაზე საქართველოს მესამე პრეზიდენტის, მიხეილ სააკაშვილის სურათით მივიდა, რასაც აქციის სხვა მონაწილეების უკმაყოფილება მოჰყვა. უკმაყოფილება დაპირისპირებაში გადაიზარდა და მოქალაქეს, რომელსაც სააკაშვილის სურათი ეჭირა, თავს დაესხნენ.
აღნიშნულს „კოალიცია ცვლილებისთვის“ ლიდერი, ნიკა მელია სოციალური ქსელით გამოეხმაურა.
„მნიშვნელოვანია შევთანხმდეთ არა პოლიტიკურ გემოვნებაზე, არამედ თამაშის წესებზე.
მძიმე იყო გუშინდელ დღეს იმის ნახვა, როგორ ართმევენ აქციის მონაწილეს მისი პოლიტიკური გემოვნების ამსახველ ბანერს, იმავე აქციის სხვა მონაწილეები.
იგივე წარმატებით მათ რომ წაართვან მეგაფონი ერთი ნებისმიერი შეძახილისთვის, რომელიც შესაძლოა ვინმეს პოლიტიკურ გემოვნებას არ შეესაბამებოდეს, ხომ იქნება მავნებლობა?
მითუმეტეს როდესაც წარმოადგენ ჯგუფს, რომელიც თითქოს სიახლის ამბიციით შემოდის პოლიტიკაში.
პირადად მე ძალიან ბევრი მტკიცებულებით გამყარებული პრეტენზია მაქვს სააკაშვილთან, მანაც იცის ეს და თავის დროზე საჯაროდაც ბევრი ითქმება რა და
როგორ მოხდა 2021 -2022 წლებში, ოღონდ ეს მოხდება მხოლოდ მისი პოლიტიკური პატიმრობის დასრულების შემდეგ;
ახლა ის პოლიტიკური პატიმარია, მის მხარდამჭერს კი აქვს უფლება ეს გააპროტესტოს.
როდესაც ერთობაზე ვსაუბრობთ – უნდა გვესმოდეს, განსხვავებულთა ერთობაშია ჩვენი ძალა და ამ პროცესში და პროტესტში, რამეს თუ გაფრთხილება სჭირდება, სწორედ ესაა“, – წერს მელია.