„თუ ვინმეს შეუძლია „დიფ სთეითი“ მაჩვენოს, მე ძალიან მაინტერესებს მისი ნახვა“ – გერმანიის ელჩი საქართველოში

საქართველოში გერმანიის ელჩმა, პეტერ ფიშერმა, IPN-სთან საქართველოსა და დასავლეთის ურთიერთობის შესახებ ისაუბრა.

ის შეეხო სხვადასხვა საკითხს და მათ შორის, კომენტარი გააკეთა „დიფ სთეითის“ შესახებ.

„ქართველ ხალხზეა დამოკიდებული, თუ რა მიმართულებით წავა ეს ქვეყანა. ჩვენ შეშფოთებულები ვართ თქვენი ევროკავშირისგან დისტანცირებით კანონის უზენაესობის, დემოკრატიისა და ადამიანის უფლებების ფუნდამენტურ სფეროებში. ჩემთვის ძნელი წარმოსადგენია, რომ საქართველო ბელარუსად იქცევა, რადგან საქართველო ძალიან შორს წავიდა, ძალიან ახლოს იყო ევროკავშირთან, მიაღწია კანდიდატის სტატუსს. დღევანდელ დღეს ვხედავ, რომ ქართველები თავისუფლებისმოყვარე ხალხია და გამოხატავენ ევროკავშირში გაწევრიანების სურვილს. ამიტომ არ ვიცი, რა ტრაექტორიას აირჩევს საქართველო. ეს ქართველი ხალხის გადასაწყვეტია, მაგრამ არ მინდა წარმოვიდგინო, რომ ეს ცუდი ტრაექტორია იქნება.

ჩვენ, გერმანელები და ევროპელები, თქვენი მეგობრები ვიყავით და თქვენს მეგობრებად დავრჩებით. ჩვენ არ ვართ მტრულად განწყობილი სუბიექტი. არ გვინდა, ქართველებს ვუთხრათ, რა გააკეთონ.

ჩვენ ნამდვილად არ ვართ „დიფ სთეითი“. ეს არ არსებობს. ეს გამოგონილია და თუ ვინმეს შეუძლია „დიფ სთეითი“ მაჩვენოს, მე ძალიან მაინტერესებს მისი ნახვა“, – განუცხადა ელჩმა „ინტერპრესნიუსს“.

ფიშერის სრული ინტერვიუ წაიკითხეთ ბმულზე.