„ფედერალისტების“ ლიდერმა, თამარ ჩერგოლეიშვილმა პირველი არხის გადაცემაში „აქტუალური თემა – მაკა ცინცაძესთან ერთად“ საქართველოში მიმდინარე პოლიტიკური პროცესების შესახებ ისაუბრა.
ის ასევე შეეხო მეხუთე პრეზიდენტის, სალომე ზურაბიშვილის ინიციატივით შექმნილ „წინააღმდეგობის პლატფორმასა“ და აღნიშნულ პლატფორმასთან „ნაციონალური მოძრაობის“ თანამშრომლობის საკითხს.
„ნაციონალურ მოძრაობაში“, არ შეიძლება, არ არსებობდნენ ადამიანები, რომლებიც სწორ სისტემაში თავს იპოვიან. თიკა ბოკუჩავას შეუძლია იყოს გამოსადეგი ამ პროცესისთვის, მაგრამ არა იმ თავისი ბელადით, რომელიც ყველაფერს აზიანებს, თუ ყურადღების ცენტრში თვითონ არ არის. არჩევანი უნდა გააკეთოს ყველამ – ცივილიზებულ პოლიტიკასა და პროცესში ყოფნა უნდა თუ უნდა თავისი ბელადის ახირებებზე ირბინოს? „ნაციონალური მოძრაობა“ თუ ითამაშებს სალომე ზურაბიშვილის მიერ დამკვიდრებული წესებით, მიშა სააკაშვილი თავისით გაქრება. გზა, რომელიც ტაძრამდე მიგვიყვანს, არის გზა, რომელსაც დღეს გთავაზობს სალომე ზურაბიშვილი, სადაც თვითონ იღებს მედიატორის როლს, რომ შექმნას სივრცე ამ გაგანია პოლიტიკური ლიდერშიფის დროს, რომ ჩვენ, პოლიტიკურმა ლიდერებმა შევძლოთ ისეთი თანამშრომლობა, რომელიც მოემსახურება ხალხის ინტერესებს და აღადგენს ნდობას ხალხთან“, – განაცხადა თამარ ჩერგოლეიშვილმა.