„სანამ პირში სული მიდგას, ჩემს ორ შვილს ვფიცავ, ესენი ვერასდროს მოვლენ“, – განაცხადა კომისიის სხდომაზე პარლამენტის დროებითი საგამოძიებო კომისიის წევრმა, ალუდა ღუდუშაურმა.
შეგახსენებთ, რომ დღევანდელ სხდომაზე განიხილება 2006 წლის ნავთლუღის სპეცოპერაციის საქმე – დაიღუპა 3 ახალგაზრდა.
სხდომაზე მიწვეულია მარად ართემალაძის მამა, მიხეილ ართემალაძე.
მისი განცხადებით, სპეცოპერაციისას მისი შვილი და სხვა ახალგაზრდები დათა ახალაიამ თანამშრომლებთან ერთად მოკლა.
„დასრულდებით კი არა, უარეს დღეში ხართ („ნაციონალური მოძრაობა“)… ადამიანებმა სათითაოდ ხელი უნდა გააყოლონ და ნახონ, ვინ უდგას ამათ გვერდში. მკვლელს, დიახ, მკვლელს რომ გვერდში დაუდგები, დღეს რომ კიდევ რაღაცას ბედავ და იქით აბრალებ და რაღაცაზე პრეტენზია გაქვს… რა პოლიტიკის კეთებაზე ვლაპარაკობთ, მაშინ, როცა ოჯახები გაანადგურეს?! სანამ პირში სული მიდგას, ჩემს ორ შვილს ვფიცავ, ესენი ვერასდროს მოვლენ. ჩვენ, მე პირადად გპირდებით და გეუბნებით, ყველაფერს გავაკეთებ, რომ არასდროს დაბრუნდეს ეს ყველაფერი. გინახავთ ჭირისუფალი, მამა, დედა, თქვე არაკაცებო? და როცა ამ ადამიანებს ნახავთ, შემდეგ გამოდით და თქვით, რა პოლიტიკაზეა ლაპარაკი. ბოდიშებს უნდა იხდიდეთ“ – აცხადებს ღუდუშაური.