„ბათუმელებისა“ და „ნეტგაზეთის“ დაპატიმრებული დამფუძნებლის, მზია ამაღლობელის სასამართლო დღევანდელ პროცესზე აჭარის პოლიციის დეპარტამენტის ყოფილი უფროსი, გრიგოლ ბესელია, იკითხება.
მან ამაღლობელის დაკავების დღეს, ჟურნალისტის მიერ ბათუმის პოლიციის უფროსის, ირაკლი დგებუაძისთვის სილის გაწვნის შედეგად მიყენებული ზიანების შესახებ ისაუბრა.
„ჩემთვის აღქმადი [დაზიანება] არის სისხლდენა, რაღაც ეგეთი დაზიანება არ მინახავს. სიწითლე ჰქონდა/არ ჰქონდა, არ მიმიქცევია ყურადღება, არც შემიხედავს, არ დავკვირვებივარ“, — განაცხადა ბესელიამ.
შეგახსენებთ, დგებუაძემ დაკითხვისას თქვა, რომ ამაღლობელის მიერ სილის გაწვნის შემდეგ, მას ლოყაზე სიწითლე ჰქონდა.
მზია ამაღლობელი 11 იანვარს, ბათუმში დააკავეს. ბათუმის საქალაქო სასამართლომ მას აღკვეთის ღონისძიების სახით პატიმრობა შეუფარდა.
მზია ამაღლობელს ბრალი სისხლის სამართლის კოდექსის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს. მას 4-დან 7 წლამდე პატიმრობა ემუქრება.