ბათუმში, გუშინ, მატარებლის დაჯახების შედეგად, 13 წლის დათუნა დუმბაძე დაიღუპა. ადგილობრივები მომხდარს რკინიგზის ლიანდაგებისა და დასახლების მჭიდრო სიახლოვით ხსნიან. მოქალაქე ნათია დეკანაძე სოციალურ ქსელში აქვეყნებს ლიანდაგზე გადასასვლელის ფოტოს.
“ასეთი გადასასვლელია სკოლასთანაც, სადაც ბავშვი დაიღუპა.
ამ გადასვლელის პირდაპირ, “ოცნება” აშენებს “პალმა ბიჩს” – ანუ ამ დამპალი ფიცრის იქეთ იწყება “პალმა ბიჩი”, სადაც ჩვეულებრივი მოკვდავი ვერ შევა, ეს კიდევ უფრო აღრმავებს კლასობრივ უთანასწორობას, რომელიც უკვე გეტოების სახით გვაქვს ბათუმში.
რაც შენდება, ისიც კი, უამრავ დასკვნაში საფრთხის შეცველია, მაგრამ ქრთამის და კორუფციული გარიგებების მთავარ ქალაქში ვის ანაღვლებს მოქალაქეების უსაფრთხოება.
ჩამოშლილ კორპუსზე და ნანგრევებში სამუდამოდ ჩაყოლილ ბავშვებზე სახელმწიფო როგორ რეაგირებს? რა პასუხისმგებლობას იღებს თავზე? მხოლოდ ერთს -კალენდარზე აღნიშნავს გლოვის დღედ.
მსგავსი ტრაგედიები ფბ პანაშვიდების შემდეგ, ერს ძაlian მალე ავიწყდება. ვეღარ ვხდები უფრო დიდი დამნაშვაე რომელია, მთავრობა თუ ამ მთავრობის მეხოტბე და მდუმარე ხალხი” – წერს ნათია დეკანაძე.
“კვირის პალიტრასთან” ერთ-ერთი ადგილობრივი ამბობს, რომ ადრე ლიანდაგთან შლაგბაუმი იყო, რომელიც აკონტროლებდა მატარებლის მიმოსვლას და ადამიანები უფრო დაცულები იყვნენ.
“საერთოდ, აქ ოდითგანვე ხდება ასეთი ტრაგედიები. ადრე, როცა ხიდი არ იყო, იყო შლაგბაუმი, რომელიც აკონტროლებდა მატარებლის მიმოსვლას და ადამიანები უფრო დაცულები იყვნენ. რაც ხიდი აშენდა, იმის შემდეგ საერთოდ აღარაფერია და ძალიან საშიშია. არადა, იქვეა სკოლა და განსაკუთრებით საშიში ის ადგილია, რადგან მოსახვევია და თითქმის არ ჩანს მატარებელი თუ მოდის, სანამ არ მიხვალ ლიანდაგთან. ადგილზე რომ ნახოთ, მიხვდებით. არანაირი დაცვის მექანიზმი არ არის, ფიცრებია გადებული გადასასვლელზე და მგონი, ეს ფიცრებიც ხალხის გადებულია.
ბარცხანის დასახლება ჰქვია ამ ადგილს. აუცილებლად უნდა იყოს იქ შლაგბაუმი ან რაიმე დამცავი, რომ მსგავსი საშინელი ტრაგედიები აღარ დატრიალდეს. ხალხი მოძრაობს ლიანდაგზე, გადადის და ასე მიდიან სახლებში. ის გადასასვლელიც კი შოკში ჩაგაგდებთ, რომ ნახოთ – ფიცრებია გადებული, რომელიც ფეხის დადგმაზე მოძრაობს. ასეთი უკონტროლო სიტუაცია რატომ უნდა იყოს? რატომ არ უნდა იყოს ადამიანების სიცოცხლე დაცული?”…