დღეს თავდაცვის ყოფილი მინისტრის, ირაკლი ოქრუაშვილის სასამართლო პროცესი გაიმართა.
მას 20 000-ლარიანი გირაო შეეფარდა.
„თავისუფლება არ იზომება არც 20 000 ლარად, არც 50 000 ლარად და არც საზღვრის კვეთის აკრძალვით. თავისუფლებას აქვს სხვა ფასი…
ცირკში სიარულის ასაკიდან, დიდი ხანია, გამოვედი. ეს [პროცესი] ჩვეულებრივი ცირკია. შეიძლება ასეც მოვიქცე – არ გადავიხადო [გირაო] …
სპორტული ინტერესი მკლავს, ეს გირაო არ გადავიხადო და ის ერთი წელი ციხეში წავიდე“, – თქვა ოქრუაშვილმა.
შეგახსენებთ, ირაკლი ოქრუაშვილს ბრალდება სისხლის სამართლის კოდექსის 349-ე მუხლით წარედგინა, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს. თავდაცვის ექსმინისტრი „ნაციონალური მოძრაობის“ ხელისუფლების საქმიანობის შემსწავლელი დროებით საგამოძიებო კომისიის სხდომაზე არ გამოცხადდა.
ეს ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.