„ყვარლის ბაგის“ მფლობელმა, ლაშა პაპაშვილმა BM.GE-სთან ინტერვიუში „რძის სკანდალის“ შესახებ ისაუბრა.
„არა, არ დაგვეხოცა, ეს ნიშნავს, რომ ჩვენ დავკალით ძროხები, იმიტომ, რომ ისინი რეზისტენტულები გახდნენ. იყო დახოცვის ქეისებიც, მაგრამ ამაზე საგადასახადო მოდის, სასაკლაოზე დამარხვა როცა ხდება, ამაზე საგადასახადო მოდის და არა სურსათის ეროვნული სააგენტო, ძაან ცოტა იყო ეგეთი. დახოცილი იქნება სულ თითზე ჩამოსათვლელი, წელიწადში 10-15-20, მაგდენიც არ იქნება…
]…] სიკვდილიანობა ნიშნავს იმას, რომ დავკალით, აბა, რას ნიშნავს სიკვდილიანობა. 3-5 დღის მკურნალობის მერე აღარაა სახიფათო ხორცი მომხმარებლისთვის…
სასაკლაოზე რომ ვაგზავნი ძროხას, რომელს გავაგზავნი, როგორ ფიქრობთ? ჯანმრთელს გავაგზავნი? მეწველს გავაგზავნი? არაბერწს გავაგზავნი? არაენდომეტრიტიანს გავაგზავნი? ვაგზავნი, რომელიც პრობლემურია – გაბერწდა, აბორტი ჰქონდა და ა.შ. ანტიბიოტიკს ვერ შეიძლება, რომ შეიცავდეს, ჩვენ არ ვყიდით, ყოველდღიურად წუნი გვაქვს ასეთი, დადგენილია საწარმოში, რომ დაახლოებით 20-30 000 ლიტრი რძე იღვრება, არ შედის, წუნია ეს დადგენილი ჩვენთან, ვერ მივაწვდი მე სანტეს და პეპსიკოს…“, – თქვა პაპაშვილმა.
შეგახსენებთ, „რადიო თავისუფლების“ ჟურნალისტური გამოძიების თანახმად, 2018 წელს „ყვარლის ბაგამ“ „ჩირინასგან“ დაახლოებით 2 700 ტონა ქათმის ნედლი, გადაუმუშავებელი ნაკელი შეიძინა.
გამოძიების ცნობით, ერთი წლის თავზე, „ყვარლის ბაგამ“ განაცხადა, რომ „ჩირინაში“ ნაყიდმა სკინტლმა, რომელსაც ძროხებს აჭმევდა, საქონელი დაუხოცა და 1.65 მილიონი ლარის ზარალი მიიღო, ხოლო „ჩირინამ“ უპასუხა, რომ ქათმის ნაკელს სასუქად ყიდდა და არა – საკვებად.
„ყვარლის ბაგამ„ სასამართლო დავა მოუგო „ჩირინას“ („ბიუ-ბიუ“), რომელსაც 4.7 მილიონის გადახდა დაეკისრა.