2024 წლის დეკემბრიდან საზოგადოებას თანამდებობის პირთა ქონებრივი დეკლარაციების ვებგვერდზე წვდომა აღარ აქვს. თუმცა დეკლარაციების ნახვა შესაძლებელია ანტიკორუფციული ბიუროს ოფიციალური ვებ-გვერდიდან (declaration.acb.gov.ge) ექსპორტირებულ მონაცემთა ბაზაში, რომელსაც IDFI აქვეყნებს, ამასთან ხაზგასმულია ის, რომ მონაცემთა ბაზები ჩამოტვირთულია საქართველოს ანტიკორუფციული ბიუროს ვებ-გვერდიდან. IDFI-ს მიერ გამოქვეყნებულია ექსპორტირებული პირველადი სახით და მის სისრულეზე და სიზუსტეზე არ იღებს პასუხისმგებლობას.
აღნიშნულ ბაზაში არსებული ინფორმაციის თანახმად სულხან თამაზაშვილმა დეკლარაცია 2024 წლის 29 ნოემბერს შეავსო, როგორც საქართველოს შინაგან საქმეთა სამინისტროს ქ. თბილისის პოლიციის დეპარტამენტის დირექტორმა.
დეკლარაციის მიხედვით, 1983 წელს დაბადებული თამაზაშვილი 2017 წლიდან ფლობს მემკვიდრეობით მიღებული სახლის 50%-ს, ქობულეთის მუნიციპალიტეტ, სოფელი ქვედა სამებაში, მე-7 ქუჩა N4, (2500 კვ.მ მიწა და 248 კვ.მ სახლი).
დეკლარაციის შევსებისას თამაზაშვილს საქართველოს ბანკის სახელფასო ბარათზე ჰქონდა 1053.11 ლარი. 2023 წლის განმავლობაში ხელფასის სახით მიღებული აქვს 98892.02 ლარი. აქვს 60 000 ლარის სამომხმარებლო სესხი აღებული. ავტომობილების, ან კომპანიების წილების ფლობასთან დაკავშირებით, თამაზაშვილის დეკლარაციაში ინფორმაცია არ იძებნება.
სულხან თამაზაშვილი დასავლეთის მიერ სანქცირებულთა სიაშია. აღნიშნულ სიაში თამაზაშვილთან ერთად შსს-ს ის მაღალჩინოსნები არიან შესული, ვინც პასუხისმგებელია ჟურნალისტებსა და მშვიდობიან დემონსტრანტებზე ძალადობრივ თავდასხმებზე.