მე პუტინის პირადი პატიმარი ვარ – მიხეილ სააკაშვილი უკრაინის პრეზიდენტს ციხიდან წერილით მიმართავს

რუსთავში, სასჯელაღსრულების მეთორმეტე დაწესებულებაში მყოფი საქართველოს ექს-პრეზიდენტი, მიხეილ სააკაშვილი უკრაინის პრეზიდენტ ვოლოდიმირ ზელენსკის წერილით მიმართავს:

„ჩემთვის უაღრესად სასიამოვნოა თქვენი სიტყვები, რომელიც არის მაღალი კლასის ნამდვილი სახელმწიფო მოხელის გამოხმაურება საქართველოში ჩემს უკანონო დაკავებასა და დაპატიმრებაზე გაყალბებული ბრალდებების საფუძველზე, რომლებსაც რუსეთის გარდა მსოფლიოში არავინ აღიარებს.

მე სიცოცხლეზე მეტად მიყვარს ჩემი საქართველო, თუმცა ძალიან მიყვარს უკრაინა, ჩემი მეორე სამშობლო, სადაც ჩემი ცხოვრების მრავალი წელი გავატარე და სადაც მყავს ოჯახი, მეგობრები, მაქვს მოქალაქეობა, რომელსაც მე ძალიან ვაფასებ. მთელი ცხოვრება ვიამაყებ იმით, რომ მქონდა შესაძლებლობა, შემეტანა მოკრძალებული წვლილი თქვენ მიერ გატარებულ ისტორიულ ცვლილებებსა და რეფორმებში. ვინაიდან ფაქტობრივად ვარ პუტინის პირადი პატიმარი, ძალიან ვაფასებ თქვენს პრინციპულ პოზიციას უკრაინის, მთელი რეგიონისა და იმპერიის ყველა პატიმრის დაცვასთან დაკავშირებით“, -აღნიშნულია მიხეილ სააკაშვილის წერილში, რომელიც “ფეისბუქის”  გვერდზე ვრცელდება.

ცნობისთვის, სააკაშვილი უკრაინის მოქალაქეა.

ვოლოდიმირ ზელენსკიმ განაცხადა, რომ უკრაინა ყველა დონეზე დააყენებს მიხეილ სააკაშვილის დაბრუნების საკითხს. მისივე განცხადებით, სააკაშვილის საქართველოში გამგზავრების შესახებ არაფერი იცოდა და მისი გადაწყვეტილება არასწორი იყო.

საქართველოს ყოფილი პრეზიდენტი,  რუსთავის მე-12 პენიტენციურ დაწესებულებაში იმყოფება, რომელშიც 1-ელ ოქტომბერს, დაკავების შემდეგ მოათავსეს.

მიხეილ სააკაშვილი შიმშილობის შეწყვეტას არ აპირებს და ცუდად გახდომის შემთხვევაში, სამედიცინო ჩარევა ციხის ექიმებსაც აუკრძალა.

https://mix.metronome.ge/%e1%83%95%e1%83%9a%e1%83%90%e1%83%93%e1%83%98%e1%83%9b%e1%83%98%e1%83%a0-%e1%83%96%e1%83%94%e1%83%9a%e1%83%94%e1%83%9c%e1%83%a1%e1%83%99%e1%83%98-%e1%83%9b%e1%83%98%e1%83%ae%e1%83%94%e1%83%98%e1%83%9a/