პროდიუსერი ნატო დუმბაძე “ფეისბუქის” პირადი გვერდის მეშვეობით მმართველ პარტიას მიმართავს და წერს, რომ ფიქრის და გაანალიზების დრო დადგა.
მისივე თქმით, მოქალაქეები არა კახა კალაძეზე, არამედ “ქართულ ოცნებაზე” არიან განაწყენებულნი.
„მოკლედ, საყვარელო ოცნებავ, დადგა დრო ფიქრის, გაანალიზების და დაფიქრების! ვგონებ, არჩევნებმა ეს დაგანახვათ!
ხალხს სჭირდებით და თქვენ მათთან გაწყვიტეთ კონტაქტი, მხოლოდ ტრიბუნიდან ესაუბრებით! გადით, გიარეთ ფეხით, ესაუბრეთ ხალხს, ოღონდ არა პიარისთვის, უბრალოდ, ადამიანურად, ყველანაირი დაცვების და მანქანის გარეშე, არავინ გერჩით!
მინდა, როგორც ევროპაში, ისე შემხვდეთ ქუჩაში, ტრანსპორტში, ბაზარში! იცით, რამდენ რამეს მოისმენთ და თან წაგადგებათ, თქვენ ხომ არ იცით, მათ რა აწუხებთ რეალურად?!
ეს ადამიანები კახიზე კი არ არიან განაწყენებული, არა, ბატონებო, კახის ღვაწლს ყველა აღიარებს, აი, ოცნებაზე კი ძალიან განაწყენებული არიან, ასე რომ, ჩამოქვეითდით და იარეთ, ისმინეთ და შეისმინეთ, შავი მანქანების და კამერებთან კოპწიაობის დრო ილევა!
P.შ. და ბოლოს, სხვაზე თითის გაშვერა და გადაბრალება არ არის ღირსეული საქციელი!“ – წერს დუმბაძე სოციალურ ქსელში.
ცნობისთვის, ცენტრალურ საარჩევნო კომისიას ამ ეტაპზე, საქართველოს მასშტაბით, 3 743 უბნიდან დათვლილი აქვს 3 740 უბნის მონაცემები, რაც 99.92%-ს შეადგენს.
ცესკოს წინასწარი მონაცემებით, პროპორციულ ნაწილში პარტიული რეიტინგები შემდეგნაირად განადაწილდა:
ქართული ოცნება – 46.65%;
ერთიანი ნაციონალური მოძრაობა – 30.7%;
გახარია-საქართველოსთვის – 7.79%
ლელო – 2.71%
ევროპული საქართველო – 1.66%;
საქართველოს პატრიოტთა ალიანსი – 1.46%
ლეიბორისტული პარტია – 1.38%
გირჩი-მეტი თავისუფლება – 1.44%
რაც შეეხება თბილისს, დედაქალაქში ხმების 100% დათვლილია. ცენტრალური საარჩევნო კომისიის ოფიციალური მონაცემებით, მმართველ გუნდს, ქართულ ოცნებას 40.3% აქვს, ერთიან ნაციონალურ მოძრაობას 27.97%, გიორგი გახარიას პარტიას საქართველოსთვის კი – 8.85%.