„ქართული ოცნების“ გენერალურმა მდივანმა, თბილისის მერმა, კახა კალაძემ მედიასთან დიდი ბრიტანეთის მიერ ქართველი მოსამართლეების – ლევან მურუსიძისა და მიხეილ ჩინჩალაძის – დასანქცირების შესახებ კომენტარი გააკეთა.
„ეს ყველაფერი დაფუძნებულია სიცრუეზე, სიყალბეზე, ტყუილზე. რეალობა რადიკალურად განსხვავებულია იმასთან შედარებით, რა განცხადებებსაც აკეთებენ ხოლმე. სამწუხაროა ეს ყველაფერი, თუმცა მოლოდინი გვაქვს, ყველაფერი რადიკალურად შეიცვლება.
ეს უბრალოდ სიტყვების ბრახაბრუხია, რა გონივრული ეჭვი?! საერთოდ, სიყალბეა ეს ყველაფერი. ეს არის იმ ხაზის გაგრძელება, რაც საქართველოსთან მიმართებით ხდებოდა. თქვენ იცით, თუ როგორ უსამართლოდ ექცევიან ჩვენს ქვეყანას. დღესაც გრძელდება ეს – მუდმივი შანტაჟი, ცილისწამება, მბრძანებლური ტონი. კონკრეტული მაღალი თანამდებობის პირების დასანქცირება შანტაჟის ერთ-ერთი ელემენტია. ამით სურვილი აქვთ, რომ როგორმე ქვეყანა ხელში ჩაიგდონ, რომ შემდეგ გამოყენებული იყოს ისეთ ქვეყნები როგორიც საქართველოა, უკრაინაა, თავიანთი ინტერესების გასატარებლად. ჩვენ ამას ვებრძვით და ამისთვის ძალიან ბევრი რამის მოთმენა მოგვიწია. ძალიან რთული იყო. მარტივი პროცესი არ ყოფილა. დღესაც გრძელდება, სამწუხაროდ, მაგრამ როცა საქმე ეხება სამშობლოს, რა თქმა უნდა, ყოველთვის დავდგებით იქ, სადაც ჩვენს ქვეყანას სჭირდება“, – განაცხადა კალაძემ.
შეგახსენებთ, დიდი ბრიტანეთის მთავრობის განცხადებით, სერიოზული ეჭვი არსებობს იმისა, რომ მიხეილ ჩინჩალაძე „კორუფციაში მონაწილეობს ან მონაწილეობდა“.
რაც შეეხება ლევან მურუსიძეს, მასთან დაკავშირებით აღნიშნულია, რომ „სერიოზული ეჭვი არსებობს იმისა, რომ იგი კორუფციაში არის ან იყო ჩართული“.