თბილისის საქალაქო სასამართლოში 26 ოქტომბრის არჩევნების შემდეგ გამართული აქციების დროს დაკავებული მათე დევიძის პროცესი გაიმართა.
დღევანდელ პროცესზე გამოიკითხა საქმეში დაზარალებული სტატუსის მქონე პოლიციელი და საქმის გამომძიებელი.
პოლიციელმა ლევან კოდალაშვილმა განაცხადა:
„19 ნოემბერს მელიქიშვილის გამზირზე ვასრულებდი სამსახურებრივ მოვალეობას, ვიცავდი წესრიგს – მცირე რაოდენობა ადამიანების კეტავდა გზას და მოვუწოდებდით გაეთავისუფლებინათ. შემდეგ სიტყვიერი შელაპარაკება მოხდა, ცოტა დაიძაბა ვითარება.. მელიქიშვილის მხრიდან დავინახე რომ მორბოდა გრძელთმიანი ხუჭუჭა ბიჭი ჯოხით ხელში, რომელიც რამდენჯერმე მოიქნია და მეც მომხვდა. ერთ-ერთი პოლიციელი ჟამერაშვილი გაეკიდა და (ბრალდებულმა) ჯოხი გადაამტვრია. ჯოხი ჩამარტყა მარცხენა ხელის მტევანზე. ცოტათი მქონდა შეწითლებული. ისეთი დაზიანება არ ყოფილა რომ სამედიცინო დაწესწბულებაში წავსულიყავი. (ტკივილის განცდა გქონდათ?) – რა თქმა უნდა ამხელა ჯოხს რომ ჩაგარტყავენ“.
საქმის გამომძიებლის გამოკითხვის დასრულებას მათე დევიძის ოჯახის წევრების ხმაური მოჰყვა.
შეგახსენებთ, რომ მათე დევიძეს სისხლის სამართლის კოდექსის შესაბამისად, 3 პოლიციელის ფიზიკურ დაზიანებას ედავებიან. მას 4-დან 7 წლამდე პატიმრობა ემუქრება.