დღეს მიმდინარე აქციებისას დაკავებული ექიმის, გიორგი ახობაძის სასამართლო პროცესი გაიმართა.
მან სასამართლოს სიტყვით მიმართა.
„ერთადერთ სიმართლეს, რომელიც ამ დარბაზში არსებობს, ვამბობ მე. მტკიცების ტვირთი თქვენზეა, მე თუ ვიტყუები, ეგ უნდა დაამტკიცოთ თქვენ. არც პროკურორმა, არც მოსამართლეებმა არ მომცეს სამართლიანი სასამართლოს უფლება.
მტკიცებულებები გააქრეს, ეგ გააკეთა ექსპერტმა, ეგ არის კორუფციული სისტემა. ჩახედეთ კოდექსს და ნახეთ რა გევალებათ [პროკურორს],
მე გუშინ წავიკითხე, მომზადებული მოვედი, თქვენც მოემზადოთ ხოლმე ჯობია. საზღვრის კვეთაზე აპელირებს ამხანაგი გობეჯიშვილი [პროკურორი] მუდმივად, ვიმეორებ, რომ პატიმრობამდე ჩემს ავადმყოფ დედას ვუვლიდი და ალბათ თქვენი მორალი გაძლევთ უფლებას იფიქროთ, რომ პატიმრობის საფრთხის შემთხვევაში საზღვარს დავტოვებდი და დედაჩემს მივატოვებდი, ალბათ თქვენ ასე მოიქცეოდით, მაგრამ მე ჩემი მორალით ამას ვერასოდეს გავაკეთებდი“, – თქვა ახობაძემ.
შეგახსენებთ, თბილისის საქალაქო სასამართლოს მოსამართლე, მიხეილ ჯინჯოლიამ აქციების დროს დაკავებული ექიმი, გიორგი ახობაძე პატიმრობაში დატოვა.
ახობაძე 7 დეკემბერს საპროტესტო აქციიდან სახლში მიმავალი პოლიციამ დააკავა. მას ბრალი სისხლის სამართლის კოდექსის 260-ე მუხლის მე-6 ნაწილით წარედგინა, რაც დიდი ოდენობით ნარკოტიკული საშუალებების უკანონო შეძენა-შენახვას გულისხმობს.
აღნიშნული მუხლი 8-დან 20-წლამდე ან უვადო თავისუფლების აღკვეთას ითვალისწინებს.