პროკურორი ლევან ვეფხვაძე “ინტერპრესნიუსთან” განმარტავს, რატომ დაემატა საქართველოს მესამე პრეზიდენტის, მიხეილ სააკაშვილისთვის საზღვრის უკანონო კვეთის საქმეზე გამოტანილ განაჩენს საბიუჯეტო თანხების გაფლანგვის საქმესთან დაკავშირებული სასჯელი, რის საფუძველზეც, საბოლოოდ, თავისუფლების აღკვეთა 12,6 წლის ვადით განესაზღვრა.
პროკურორის თქმით, რადგან ბრალდებული წარსულში იყო ნასამართლევი და „შემდეგ რიგი დანაშაულები ჰქონდა ჩადენილი“, ეს დანაშაულის რეციდივის პირობებში ჩადენილი ორი დანაშაულია და ამიტომ, მოსამართლეს ჰქონდა უფლება გამოეყენებინა, როგორც სასჯელის სრული, ასევე მისი ნაწილობრივი შეკრება.
„სასამართლომ კანონიერი, დასაბუთებული და სამართლიანი განაჩენი დაადგინა. ბრალდებული მიხეილ სააკაშვილი წარდგენილ ბრალდებაში იმ მტკიცებულებების საფუძველზე ცნო დამნაშავედ, რომელიც ასაბუთებდა ბრალდებულის მიერ ჩადენილ დანაშაულებრივ ქმედებას, რაც გამოიხატა საზღვრის უკანონოდ გადაკვეთის ფაქტზე. რაც შეეხება სასჯელს, იმის გათვალისწინებით, რომ ბრალდებული წარსულში იყო ნასამართლევი და მას შემდეგ ჰქონდა რიგი დანაშაულები ჩადენილი, ეს გამოდის დანაშაულის რეციდივის პირობებში ჩადენილი ორი დანაშაული, შესაბამისად, მოსამართლეს ჰქონდა სრული უფლება გამოეყენებინა, როგორც სრული შეკრება, ასევე ნაწილობრივ შეკრება. სასამართლომ გაითვალისწინა ეს გარემოება და გამოიყენა ნაწილობრივ შეკრება. კონკრეტულად რაზე დაყრდნობით იმსჯელა, ამას უკვე დასაბუთებულ განაჩენში ვნახავთ“, – განაცხადა პროკურორმა.
შეგახსენებთ, რომ მოსამართლის გადაწყვეტილებით, საზღვრის უკანონო კვეთის საქმეზე მიხეილ სააკაშვილს 4,6 წლით თავისუფლების აღკვეთა მიესაჯა. მას ასევე დაემატა საბიუჯეტო თანხების გაფლანგვის საქმიდან სასჯელი 8 წლით. ჯამში კი თავისუფლების აღკვეთა 12,6 წლის ვადით განესაზღვრა.