საქალაქო სასამართლოში მიმდინარე აქციებისას დაკავებული 8 პირის – ზვიად ცეცხლაძის, ვეფხია კასრაძის, ირაკლი მიმინოშვილის, ვასილ კაძელაშვილის, თორნიკე გოშაძის, ნიკოლოზ ჯავახიშვილის, გიორგი გიორგაძისა და ინსაფ ალიევის – წინასასამართლო სხდომა მიმდინარეობს.
პროცესის დაწყებამდე „ტვ პირველთან“ მიმინოშვილის დედამ, ელენე ხუნდაძემ კომენტარი გააკეთა.
„არაფერს არ ველოდებით იმიტომ, რომ ვიცით, ვისთან და რასთან გვაქვს საქმე, მაგრამ მინდა, რომ იცოდნენ, რომ არ გავწირავთ ჩვენ-ჩვენს შვილებს, ვიბრძოლებთ ბოლომდე! რაც უფრო მეტს გაგვაბრაზებენ აი, ამ უმოქმედობის და უსამართლობის ფონით, უფრო მეტს მიიღებენ ჩვენგან.
ჩემს ტანჯვით გაზრდილ შვილს ვერ შევწირავ ამ რეჟიმს!“, – თქვა მან.
შეგახსენებთ, დაკავებულებიდან სამს – ზვიად ცეცხლაძეს, ვეფხია კასრაძესა და ვასილ კაძელაშვილს – ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.
ხუთ მათგანს კი – გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს – ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ.