სტიქიის ზონაში ვითარება კრიტიკულია – მოქალაქეები “ტვ პირველის” ეთერში ამბობენ, რომ საკვების მარაგები ეწურებათ და “ქართული ოცნების” მაღალჩინოსნებისგან უპატრონოდ არიან მიტოვებულები.
გურიის მკვიდრი ქრისტინე სიხარულიძე გვაწვდის ინფორმაციას, რომ სოფელ მერიაში 85 წლის ომარ ბარამიძე სახლში მარტო იმყოფება და საცხოვრებლის დატოვებას ამ დრომდე ვერ ახერხებს – “ეზოში დენის კაბელებია ჩამოყრილი, რაც საფრთხეს წარმოადგენს”.
სოფელ მერიაში ომარი ბარამიძეა 85 წლის, რომელიც მარტო არის სახლში. დენის კაბელები ჩამოყრილი, სამი დღეა რეკავენ ყველგან, მაგრამ არავინ არ ეხმარება. ვერ ახერხებს სახლიდან გამოსვლას და კაბელები ჩამოყრილია ეზოში, რაც საფრთხეს წარმოადგენს. სამი დღეა არავინ მისულა და მოუკითხია მისი ამბავი”, – ამბობს ქრისტინე სიხარულიძე.
დასავლეთ საქართველოში სტიქია მძვინვარებს – დიდთოვლობამ განსაკუთრებით დიდი პრობლემები გურიასა და აჭარაში შექმნა. ათობით სოფელი გარესამყაროს არის მოწყვეტილი. უამრავი ოჯახი სახლ-კარის გარეშეა დარჩენილი. მოსახლეობის უმტესობას არ მიეწოდება ელექტროენერგია და წყალი. ადგილზე ჩავიდნენ თავდაცვის ძალები, ასევე მოხალისეების დიდი ჯგუფი.