ქუთაისში კორონავირუსით ინფიცირებული ტყუპები, რომლებიც კლინიკა “ბომონდის” ახალშობილთა ინტენსიური თერაპიის განყოფილებაში მკურნალობდნენ, გარდაიცვალნენ.
სამწუხარო ინფორმაციას სამოქალაქო აქტივისტი, გიგა მაქარაშვილი “ფეისბუქის” პირად გვერდზე ეხმაურება:
“გული რომ გაგისკდება ტკივილისგან ისეთი ამბავია… სამაგიეროდ +2 კვართი და ჯვარი გაყიდა საპატრიარქომ…
აუცილებლად აიცერით” – წერს მაქარაშვილი სოციალურ ქსელში.
ცნობისთვის, ტყუპები, რომლებიც 28 კვირის ვადაზე დაიბადნენ, სამედიცინო დაწესებულებაში ერთ თვეზე მეტი ხნის განმავლობაში მკურნალობდნენ.
“ბომონდის” ახალშობილთა ინტენსიური თერაპიის ცნობით, “ტყუპები დაბადებისთანავე აპარატზე გადავიდნენ. რესპირატორული დისტრეს სინდრომით დაიბადნენ და დინამიკაში დამძიმდნენ. ორივე ტყუპი კოვიდდადებითი დაიბადა. კოვიდური პნევმონია ჰქონდათ. მთელი განყოფილება 24-საათიან რეჟიმში ვიბრძოდით მათი სიცოცხლისათვის. პატარებისთვის მკურნალობა და ყურადღება არ დაგვიკლია, თუმცა ამის მიუხედავად, სამწუხარო შედეგი დადგა”, – განაცხადა “კლინიკა ბომონდის” ახალშობილთა ინტენსიური განყოფილების ხელმძღვანელმა მარინა ბარათაშვილმა.
ტყუპების დედა, 47 წლის ქალი კორონავირუსით აგვისტოში გარდაიცვალა.