მიმდინარე აქციებისას დაკავებული „ბათუმელი მედროშე“, თემურ ქათამაძე 26-დღეა, შსს-ის მიგრაციის დეპარტამენტის დროებითი განთავსების ცენტრში შიმშილობს.
„მისი ჯანმრთელობის მდგომარეობის შესახებ ინფორმირებულია სახალხო დამცველის აპარატი და მათგან მოწოდებული ინფორმაციის თანახმად, სამედიცინო დოკუმენტაციის გაცნობის შემდეგ გამოიკვეთა გარკვეული სამედიცინო გამოკვლევების ჩატარების აუცილებლობა. აღსანიშნავია, რომ სახალხო დამცველის აპარატმაც ვერ მიიღო სამედიცინო დოკუმენტები დროულად.
დაკავებულის სიცოცხლესა და ჯანმრთელობაზე პასუხისმგებელია სახელმწიფო, რადგან ის სახელმწიფოს კონტროლის ქვეშ იმყოფება. შესაბამისად, თემურ ქათამაძის ჯანმრთელობის დამძიმება ან რაიმე მძიმე შედეგი სრულად სახელმწიფოს პასუხისმგებლობა იქნება.
მოვუწოდებთ შინაგან სამინისტროს, დაუყოვნებლივ მოგვაწოდოს ინფორმაცია რა კვლევები უტარდება თემურ ქათამაძეს და როგორია მისი ჯანმრთელობის მდგომარეობა“, – აღნიშნულია საია-ს განცხადებაში.
შეგახსენებთ, ბათუმის აქციების ერთ-ერთი მონაწილე, თემურ ქათამაძე, ადმინისტრაციული პატიმრობის ვადის ამოწურვის შემდეგ, 16 იანვარს, სამტრედიის იზოლატორიდან გაათავისუფლეს და მაშინვე ისევ დააკავეს.
შსს-ში გამოცემა „ბათუმელებს“ უთხრეს, რომ ის საქართველოში არალეგალურად იმყოფება.
როგორც ცნობილია, თემურ ქათამაძე მუჰაჯირების შთამომავალია, იგი წლებია საქართველოში ცხოვრობს და მოქალაქეობას ითხოვს.