ყვარელში “საქართველოს ბანკზე” თავდამსხმელი დააკავეს. რამდენიმე საათის განმავლობაში დამნაშავესა და პოლიციას შორის მოლაპარაკება მიმდინარეობდა. ამის შესახებ შსს-ს წარმომადგენელმა ქეთი კოვზიაშვილმა ჟურნალისტებს აცნობა.
“გიდასტურებთ, რამდენიმე საათიანი სპეცოპერაცია წარმატებით დასრულდა, შსს-ს თანამშრომლებმა დააკავეს და გაანეიტრალეს პირი, რომელიც იყო ბანკში და ჰყავდა მძევლები აყვანილი. როგორც უკვე მოგახსენეთ, ყველა მძევალი თავისუფალია, მათ სიცოცხლეს და ჯანმრთელობას საფრთხე არ ემუქრება. გამოძიება მიმდინარეობს, დანარჩენ დეტალებზე მოგვიანებით მოგახსენებთ. გამოძიება სამი მუხლითაა დაწყებული,” – განაცხადა შსს-ს საზოგადოებასთან უერთიერობის სამსახურის ხელმძღვანელმა.
ცნობისთვის, „საქართველოს ბანკის“ ფილიალში შეიარაღებული პირი დაახლოებითი 16:00 საათისთვის შეიჭრა.
შსს-ის ცნობით, თავდასხმის შესახებ შეტყობინების მიღებისთანავე პოლიციის თანამშრომლებმა, მყისიერი რეაგირება მოახდინეს. ამჟამად ადგილზე მობილიზებული სამართალდამცველები ტერიტორიას უკვე ტოვებენ.