„კი, „ვაპიპინებინებდი“ „ლამბორჯინზე” – კალაძე სააკაშვილზე

„კი, „ვაპიპინებინებდი“ „ლამბორჯინზე“ – ასე გამოეხმაურა თბილისის მერი კახა კალაძე საქართველოს ექს-პრეზიდენტი განცხადებას იმის შესახებ, რომ ის მიხეილ სააკაშვილს წლების წინ მანქანით ასეირნებდა. ა

აღნიშნულზე კახა კალაძემ გადაცემაში „არჩევნები 2021“ ისაუბრა და აღნიშნა, რომ სააკაშვილთან მისი ურთიერთობა სანდრო გირგვლიანის საქმეზე გაკეთებული კრიტიკული განცხადებების შემდეგ შეიცვალა.

„კი, „ვაპიპინებინებდი“ „ლამბორჯინზე“, თუმცა ისიც მითხრეს, რომ თურმე გირგვლიანთან დაკავშირებით ჩემი პოზიცია არ ახსოვს, არ დაიმახსოვრა. ეს მართლაც ძალიან მძიმე იყო. მახსოვს ის გადაცემა, ინგა გრიგოლიასთან ვიყავით პირდაპირ ეთერში. მე არასდროს მოვრიდებივარ ქვეყანაში მიმდინარე პროცესებს, ჯერ კიდევ მაშინ, როდესაც სპორტით ვიყავი დაკავებული. რა თქმა უნდა, ყოველთვის ვსაუბრობდი, თუ რამე კარგი კეთდებოდა ჩემს ქვეყანაში და მიხაროდა. ასევე, ვსაუბრობდი იმ ნეგატიურ და პრობლემურ საკითხებზე, რომელიც მაწუხებდა მე და აწუხებდა ჩვენი ქვეყნის მოსახლეობას. შესაბამისად, ძალიან არ ესიამოვნათ ის, თუ რაზე გავაკეთე მაშინ აქცენტები. ზუსტად მას შემდეგ დაიწყო პრობლემები. არსენალთან დაკავშირებით საინვესტიციო ვალდებულება რაც გვქონდა აღებული, პრობლემების შექმნა დაიწყეს. დღეს კი ამბობს, რომ თვითონ არაფერ შუაშია, ეკონომიკის მინისტრი იღებდა გადაწყვეტილებასო, მაგრამ ვის სჯერა ამის?! ბავშვები არავინ ვართ. ასეთ გადაწყვეტილებას მის გარეშე ვერავინ მიიღებდა, მითუმეტეს, მაშინ“, – განაცხადა კახა კალაძემ.

მისივე თქმით, მიხეილ სააკაშვილის მხრიდან ურთიერთობის შეცვლა შურისძიება იყო.

„რა თქმა უნდა, ეს იყო შურისძიება. ასევე, ისიც მინდა აღვნიშნო, რომ მე მაშინ პოლიტიკაში არ ვიყავი, სპორტით ვიყავი დაკავებული. არც ბიძინა ივანიშვილს ვიცნობდი. უბრალოდ გაგებული მქონდა, რომ იყო ქველმოქმედი და ძალიან ბევრ კეთილ საქმეს აკეთებდა. ბიძინა ივანიშვილი 2011 წელს გავიცანი, სანამ ზოგადად, მივიღებდი გადაწყვეტილებას პოლიტიკაში მოსვლასთან დაკავშირებით. მანამდე შეხება არასდროს მქონია“, – აღნიშნა კალაძემ.

მიხეილ სააკაშვილმა ტელეკომპანია „პირველის“ გადაცემაში “რეაქცია”კახა კალაძესთან დაკავშირებით საუბრისას აღნიშნა, რომ მათ შორის არსებული ურთიერთობა არსენალის მთაზე მიმდინარე მშენებლობების შემდეგ შეიცვალა.

“კახა კალაძე არის ჩვეულებრივი მედროვე. ჩვენთან ურთეიერთობა დაეძაბა მას შემდეგ რაც მახოსოვს კარგად იმიტომ, რომ არსენალის მთაზე აიღო ვალდებულება რომ უნდა ჩაედო ფული მერე აღარ ჩადო და მერე მოვიდა და უფასოდ მომეცითო რაზეც უარი მიიღო. მერე გაიქცა ივანიშვილთან იმან მისცა კაპიკები და ამ კაბიკებიდან ამან დიდი ფული გააკეთა. ეგ იყო მთელი ისტორია. ყოველთვის მლიქვნელი იყო. ყოველთვის თავს მიხრიდა, ხან ფეხბურთს მეთამაშებოდა ხან თავის ლამბურჯინზე მაკატავებდა, ” – თქვა სააკაშილმა ინგა გრიგოლიასთან ინტერვიუში.