პარლამენტის შესასვლელთან რკინის დამცავი ჯებირის დაზიანებისთვის დაკავებულ ომარ ოკრიბელაშვილსა და საბა მეფარიშვილს სასამართლომ განაჩენი დღეს გამოუტანა.
ისინი წარდგენილ ბრალდებაში დამნაშავედ იქნენ ცნობილი.
საპროცესო შეთანხმების მიხედვით, მათ სასჯელის სახედ 3 წელი განესაზღვრათ, თუმცა, ამნისტიის შედეგად, მათ ეს სასჯელი 2,6 წელი გაუხდათ, საიდანაც მსჯავრდებულებს
1,6 წელი რეალური სასჯელის მოხდა მოუწევთ, 1 წელი კი პირობითი სასჯელი განესაზღვრათ, რაც ნიშნავს იმას, რომ ორივე პირი პენიტენციურ დაწესებულებაში კიდევ 10 თვეს გაატარებს.
როგორც საბა მეფარიშვილის ადვოკატი დავით გამყრელიძე განმარტავს, მას შემდეგ, რაც მოსამართლე ნათია გუდაძის მიერ დასაბუთებული განაჩენი ჩაბარდებათ, ისინი პრეზიდენტის ადმინისტრაციას მიმართავენ.
„ჩვენ შესაძლებლობა გვაქვს ოქმით პრეზიდენტს მივმართოთ შეწყალების თხოვნით. სავარაუდოდ, მოსამართლე ნათია გუდაძე დასაბუთებულ განაჩენს ჩაგვაბარებს, რასაც პრეზიდენტის ადმინისტრაციაში წარვადგენთ. იმედს ვიტოვებთ, რომ ახალი პრეზიდენტი ამ ბავშვებს საპატიმროში არ დატოვებს, შეიწყალებს და ისინი ოჯახებს დაუბრუნდებიან“, – განაცხადა გამყრელიძემ.