ამ წუთებში აქციების დროს დაკავებული 11 ახალგაზრდის სასამართლო პროცესი მიმდინარეობს.
ერთ-ერთმა დაკავებულმა, ანდრო ჭიჭინაძემ, მოსამართლეს სიტყვით მიმართა: „ძალიან უცნაური პროცესია საერთოდ ვერ ვხვდები. გამახსენდა ჯოზეფ კა არის ერთი პერსონაჟი კაფკასი, რომელსაც სასამართლო პროცესი აქვს და არ იცის, რა ხდება მის თავს – ეს რომანი არის გაურკვევლობაზე, აბსურდია, ამ გაურკვევლობის შეგრძნებაზეა. ვფიქრობდი, როგორ შეიძლება ეს შეგრძნება პრაქტიკაში გაცოცხლდეს-მეთქი და რაღაცნაირად, მოხერხდა და ძალიან უცნაურია, ერთი მხრივ, მეორე მხრივ, საინტერესო. ჩვენ ადამიანებად გვაყალიბებს არა მარტო წარსული, არამედ როგორ აღვიქვამთ და ვხედავთ მომავალს.“
შეგახსენებთ, თბილისის საქალაქო სასამართლო აქციების საქმეზე დაკავებული 11 ბრალდებულის: ანდრო ჭიჭინაძის, ონისე ცხადაძის, რევაზ კიკნაძის, გურამ მირცხულავას, ლუკა ჯაბუას, ჯანო არჩაიას, რუსლან სივაკოვის, ვალერი თეთრაშვილის, გიორგი ტერიშვილის, ირაკლი ქერაშვილისა და სერგეი კუხარჩუკის საქმეს განიხილავს.
11-ვე დაკავებულს ბრალი საქართველოს სისხლის სამართლის კოდექსის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს. მუხლი სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.