ჟურნალისტ ინგა გრიგოლიას განცხადებით, ვახო სანაიას თავდასხმის საქმეზე მოსამართლის მიერ გამოტანილი გადაწყვეტილება მოულოდნელი არ ყოფილა. მისი თქმით, “დღეს ხელისუფლებამ კიდევ ერთხელ უთხრა მოძალადეებს, სადაც დაინახავთ ჟურნალისტებს ცემაში მოკალით, თქვენი თავისუფლება გარანტირებულია.”
“თუ არ ვცდები მე ვიყავი იმ უმცირესობაში ჩემს გოლეკებს შორის, რომელიც ვამბობდი, რომ მათ აუცილებლად გაათავისუფლებდნენ, იმიტომ, რომ ეს იყო ხელისუფლების მთავარი გზავნილია. დღეს ხელისუფლებამ კიდევ ერთხელ უთხრა მოძალადეებს, სადაც დაინახავთ ჟურნალისტებს, ვინ გვაკრიტიკებს, დაესხით თავს, მოკალით ცემაში, მაგრამ თქვენი თავისუფლება გარანტირებულია. აი, დღევანდელმა მართლა დამონებულმა სასამართლომ, ეს ყველაფერი ცხადყო. სპეციალურად მიუსაჯეს ექვსი თვე, იმიტომ, რომ უკვე გაათავისუფლონ, რადგან წინ არის არჩევნები… ჩვენ გვყავს მოძალადე ხელისუფლება და დღეს ეს კიდევ ერთხელ დაამტკიცა,” – განაცხადა გრიგოლიამ “ფორმულასთან” საუბარში.
თბილისის საქალაქო სასამართლოს მოსამართლემ ჟურნალისტ ვახო სანაიაზე თავდასხმაში ბრალდებული სამივე პირი – ვაჟა გიგაური, სულიკო საყევარაშვილი და გიორგი სახელაშვილი დამნაშავედ ცნო და მათ 6 თვიანი პატიმრობა შეუფარდა, თუმცა პატიმრობის ვადა დღეს იწურება. შესაბამისად, მოსამართლის მიერ მიღებული გადაწყვეტილების შესაბამისად, სამივე პირი დღესვე გათავისუფლდება.
სამართალდამცავებმა ვახო სანაიას მიმართ, მისი პროფესიული საქმიანობის გამო განხორციელებული დევნისა და დისკრიმინაციის ნიშნით შეუწყნარებლობის მოტივით მუქარის ფაქტზე 3 პირი დააკავეს. მათ ბრალდება საქართველოს სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით, 151-ე მუხლის პირველი ნაწილით და 126-ე მუხლის პირველი ნაწილით წარედგინათ, რაც სასჯელის სახედ და ზომად 3 წლამდე თავისუფლების აღკვეთას ითვალისწინებს
https://mix.metronome.ge/20502-2/