თბილისის საქალაქო სასამართლომ 6-6 თვით პატიმრობა მიუსაჯა ტელეკომპანია “ფორმულა”-ს წამყვან ვახო სანაიაზე თავდასხმაში ბრალდებულ სამ პირს. ისინი 25 თებერვალს დააკავეს და მას შემდეგ წინასწარ პატიმრობაში იმყოფებოდნენ. შესაბამისად, პატიმრობის 6-თვიანი ვადა ამოწურული აქვთ და სასამართლოს დარბაზიდან გათავისუფლდებიან.
აღნიშნულ გადაწყვეტილებას ტელეწამყვანი ვახო სანაია სოციალურ ქსელში ეხმაურება და საქმის მოსამართლეს სამარცხვინო უწოდებს.
“გაუშვა მოსამართლემ სამივე. მაგარი სასამართლოა ძალიან ! კერატიშვილი – სამარცხვინო მოსამართლე ! არჩევნები მოდის – მოძალადეები სჭირდება ივანიშვილის ხელისუფლებას და უგზავნის სიგნალს ! – წერს ვახო სანაია “ფეისბუქის” პირად გვერდზე.
ვახო სანაიას განცხადებით, მას თბილისში ფიზიკურად გაუსწორდნენ 24 თებერვალს ღამით, როცა ოჯახის წევრებთან ერთად სახლში ბრუნდებოდა. ჟურნალისტს ტვინის შერყევა ჰქონდა.
სანაია თავდასხმას მის ჟურნალისტურ საქმიანობას უკავშირებს.
სამართალდამცავებმა ჟურნალისტის მიმართ, მისი პროფესიული საქმიანობის გამო განხორციელებული დევნისა და დისკრიმინაციის ნიშნით შეუწყნარებლობის მოტივით მუქარის ფაქტზე სამი პირი დააკავეს. მათ ბრალდება საქართველოს სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით, 151-ე მუხლის პირველი ნაწილით და 126-ე მუხლის პირველი ნაწილით წარედგინათ, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.