ვარკეთილის მესამე მასივში ერთ-ერთ კორპუსში გაჩენილ ხანძარს ახალგაზრდა ბიჭის სიცოცხლე ემსხვერპლა. როგორც საგანგებო სიტუაციების მართვის სამსახურში ამბობენ, ხანძარი საცხოვრებელი კორპუსის მესამე სართულზე გაჩნდა. საუბედუროდ, ხანძარს 21 წლის ლევანი ანდრიაშვილის სიცოცხლე ემსხვერპლა, მან ბინიდან გამოსვლა ვერ შეძლო. ამ დროისთვის ხანძარი ლიკვიდირებულია, თუმცა ხანძრის გაჩენის მიზეზები და სხვა დეტალები ჯერჯერობით უცნობია. სავარაუდოდ, ექსპერტიზა დაინიშნება და ისინი დაადგენენ ტრაგედიის მიზეზს.
დეტალებზე საუბარი უჭირთ მეზობლებს. ისინი ვერ ამბობენ რისგან გაჩნდა ბინაში ხანძარი. მათი თქმით, ბიჭი ბინაში მარტო იყო და იქიდან გამოსვლა, სამწუხაროდ, ვერ შეძლო.
“როგორც გავიგე დღეს საღამოს, 6 საათზე ვარკეთილში საშაურმეში ყოფილა ლევანი მეგობრებთან ერთად. შაურმა და ლუდი მიირთვა, როგორც ჩანს, ამის შემდეგ სახლში წავიდა. ხანძარი რისგან გაჩნდა ჯერჯერობით არ ვიცით.
თავზარდაცემული ვარ ამ ამბით, სიტყვებს თავს ვერ ვუყრი. სახლში ვიყავი და აქ მესმოდა პატრულის მანქანების და სახანძროს სირენების ხმა. იმხელა ტრაგედიაა მომხდარი, სიტყვებს ვერ ვპოულობ. საშინელება დატრიალდა. ძალიან კარგი ბიჭი იყო ლევანი. ამ ამბის გამო მართლა ძალიან ცუდად ვარ, ახლა ვცდილობ, დეტალები გავარკვიო.
ამბობენ, სახლში მარტო იყოო, როგორ ვერ გამოვიდა, კარები ჰქონდა ალბათ ჩაკეტილი. არ ვიცი, რა ვთქვა, ახლა მივდივარ იქ და გავარკვევ, რა მიზეზით დატრიალდა ეს უბედურება.
უმძიმესია რაც მოხდა, ვუსამძიმრებ მისი ოჯახის წევრებს,” – ამბობს ქალბატონი, რომელიც გარდაცვლილ ახალგაზრდას იცნობდა.
“21 წლის იყავი ლევან, ეს რა გავიგე დღეს და რა ვნახე, ჩემო ძმაო, რა სიმწარე ნახე, ბიჭო, ლევან” – დაწერა ახალგაზრდამ, რომელიც ლევან ანდფრიაშვილს პირადად იცნობდა, თუმცა ჩვენთან საუბარში თქვა, რომ მომხდარის დეტალები მისთვის უცნობია.
ერთი ვერსიით, სიგარეტის ნამწვისგან გაჩნდა ხანძარი. ვარაუდობენ, რომ ამ დროს ბიჭს ეძინა და მან დროულად ვერ შენიშნა ცეცხლი, ამიტომ, ბინიდან გამოსვლა ვეღარ შეძლო. უფრო მეტი დეტალი მოგვიანებით გახდება ცნობილი. ფაქტზე გამოძიება გრძელდება და გამომწვევ მიზეზებს სამართალდამცავები დაადგენენ.
წყარო:kvirispalitra.ge