სიბრალულით უნდა აღვნიშნო ის, რომ ძალიან მეცოდება ჩვენი ოპონენტები და მთლიანი ოპოზიცია. – ამის შესახებ საქართველოს პრემიერ-მინისტრმა ირაკლი ღარიბაშვილმა ხელვაჩაურის მერობის კანდიდატის წარდგენაზე განაცხადა.
“რასაც ვუყურებ, ძალიან მძიმე მდგომარეობაში არიან. მეორე მხრივ, ვხედავთ, რომ ისინი არიან უბრალოდ “წყალწაღებული ხავსს ეკიდებოდა” მდგომარეობაში, მაგრამ ეს არ უნდა იყოს ჩვენი მთავარი საზრუნავი.
ჩვენი მთავარი ოპონენტი დღეს არის ის გაჭირვება და ჯერ კიდევ ის ეკონომიკური სიდუხჭირე, რომელიც ჯერ კიდევ ჩვენს მოქალაქეებს აქვთ. ეს უნდა იყოს ჩვენი მთავარი, ასე ვთქვათ, მოწინააღმდეგე და ასეც იქნება”– განაცხადა პრემიერმა.
მთავრობის მეთაური განცხადებას საქართველოს ექს-პრეზიდენტი მიხეილ სააკაშვილი “ფეისბუქის” პირად გვერდზე ასე ეხმაურება:
“შე მართლა საცოდავო, ივანას მატლო, ქართველი ხალხი გადაგივლით 2 ოქტომბერს, რომელიც ასე დაამცირეთ, შეურაცხყავით და საშინელ უბედურებამდე მიიყვანეთ. არ შეგარჩენთ შენს პატრონთან ერთად, ხალხის ამ მდგომარეობამდე მიყვანას და ჩვენი სამშობლოს განადგურებას!,” – წერს სააკაშვილი სოციალურ ქსელში.