ნახევარქათამა გადაწყვეტილება პატივისცემას არ იმსახურებს. მელიამ როგორც ჩანს ვერ დაარწმუნა გუნდი, თვითონ გამოდის და სახეს ინარჩუნებს ვითომ, ტექნიკური გუნდი დატოვა. არასერიოზულობაა”, – ასე ეხმაურება ჟურნალისტი თამარ ჩერგოლეიშვილი სოციალურ ქსელში “”ნაციონალური მოძრაობის” ლიდერის ნიკა მელიას გადაწყვეტილებას საპარლამენტო მანდატის დატოვებასთან დაკავშირებით.
მანამდე კი ჩერგოლეიშვილმა შემდეგი სახის პოსტი გამოაქვეყნა:
“მე მგონი ენმ-მა გრძელი კაბა უნდა ჩაიცვას, რომ მოძალადეს მოკლე კაბით მიცემული გაუპატიურების არგუმენტი გამოაცალოს.
აი, ასეთ სიგიჟეებს ურჩევენ მაგ საწყალ პარტიას “კეთილისმსურველები” – შარლ მიშელის დარღვეულ შეთანხმებას მოაწერეთ ხელი, რომ დამრღვევებს არგუმენტი გამოაცალოთო.
ასეთი უძალობა როგორ უნდა იყოს ვინმესთვის მიმზიდველი? – დაწერა თამარა ჩერგოლეიშვილმა “ფეისბუქის” პირად გვერდზე.
შეგახსენებთ, რომ “ერთიანი ნაციონალური მოძრაობის” თავმჯდომარე ნიკა მელიამ საპარლამენტო მანდატი დატოვა. როგორც მელიამ დღეს გამართულ ბრიფინგზე აღნიშნა, ის მთლიანად ადგილობრივ არჩევნებზე იქნება გადართული.
ამასთან, მან განაცხადა, რომ პარტიის სხვა წევრები პარლამენტში ფორმალურად რჩებიან, რათა პროპორციულ საარჩევნო სისტემასთან დაკავშირებული ცვლილებები, მმართველ გუნდს ბოლომდე მიაყვანინონ.
“მე პირადად მთლიანად მივდივარ ოქტომბრის რეფერენდუმის ბრძოლაში და ვტოვებ იქაურობას. მე ვტოვებ საპარლამენტო მანდატს და თხემით-ტერფამდე გადავდივარ ელენესთან ერთად, ქართველ ხალხთან ერთად უმნიშვნელოვანეს რეფერენდუმში მონაწილეობის მისაღებად”,- განაცხადა მელიამ.
გუშინ, “ქართული ოცნებამ” შარლ მიშელის დოკუმენტი ანულირებულად გამოაცხადა. ამით მმართველმა გუნდმა უარი თქვა დოკუმენტში გაწერილ ვალდებულებაზე – არჩევნებში 43%-ის ვერაღების შემთხვევაში, რიგგარეშე არჩევნების დანიშვნაზე. როგორც “ქართული ოცნების“ თავმჯდომარე ირაკლი კობახიძემ აღნიშნა, რიგგარეშე არჩევნების დანიშვნა “მათ კეთილ ნებაზე” იქნება დამოკიდებული.
აღნიშნული გადაწყვეტილების შემდეგ პარლამენტი დატოვა “გირჩი – მეტი თავისუფლების” ლიდერმა, ზურა ჯაფარიძემ. საკანონმდებლო ორგანოს დატოვებასთან დაკავშირებით გადაწყვეტილება მიიღო, დამოუკიდებელმა დეპუტატმა, თამარ კორძაიამაც.