“მთავარი არხის” თანამშრომლებმა კულტურის მინისტრ თეა წულუკიანის წინააღმდეგ პროკურატურაში სარჩელი შეიტანეს, რაც “რუსთავი 2”-სა და “საზოგადოებრივ მაუწყებელს” არ გაუშუქებია. აღნიშნულთან დაკავშირებით “მთავარი არხის” გენერალურმა დირექტორმა ნიკა გვარამიამ “ფეისბუქის” პირად გვერდზე პოსტი გამოაქვეყნა, სადაც “რუსთავი ორსა” და საზოგადოებრივ მაუწყებელს მიმართავს:
“ძალიან ტეხავს “რუსთავი 2”, პირველი არხი, მამუკა მდინარაძე რომ წყვეტს, რა უნდა გააშუქოთ და რა არა, როგორ უნდა გააშუქოთ და როგორ არა. თან ხო გააჩნია თემას. და თან ხო გააჩნია ვინ წყვეტს,” – წერს გვარამია სოციალურ ქსელში.
შეგახსენებთ, რომ „მთავარმა არხმა“ კულტურის მინისტრის თეა წულუკიანის მიერ ტელეკომპანიის კუთვნილი მიკროფონის წართმევის გამო პროკურატურას განცხადებით მიმართა. ტელეკომპანია კუთვნილი ნივთის დაუყოვნებლივ დაბრუნებასა და მომხდარ ფაქტზე გამოძიების დაწყებას ითხოვს. როგორც პროკურატურის წინ გამართულ ბრიფინგზე „მთავარი არხის“ გენერალურმა დირექტორმა, ნიკა გვარამიამ განაცხადა, თეა წულუკიანმა 22 ივლისს ტელეკომპანიის ჟურნალისტის წინააღმდეგ სისხლის სამართლის კოდექსით გათვალისწინებული 2 დანაშაული ჩაიდინა – პროფესიულ საქმიანობაში ხელის შეშლა და ძარცვა.