ვაკო ავალიანი “მაესტროს” ტოვებს. ტელეკომპანია “მაესტროს” აღმასრულებელი დირექტორი წასვლის მიზეზად არხზე მიმდინარე ცვლილებებს ასახელებს, კერძოდ, ის ამბობს, რომ გია გაჩეჩილაძე (“უცნობი”) არხზე ბრუნდება და ახალი პრიორიტეტები მისთვის მიუღებელია”.
“ვტოვებ მაესტროს, სადაც კარგი მეგობრები და საქმის ერთგული მაგარი ადამიანები შევიძინე. გაიგე ამბავი – არხის სლოგანია, რომელიც სრულად ესადაგება სამაუწყებლო ბადეს. არხზე ბრუნდება გია გაჩეჩილაძე (რამდენიმე პროექტით). არხის ახალი პრიორიტეტები ჩემთვის მიუღებელია! ყველაფრის მიუხედავად, წარმატება მაესტროს და მაესტროელებს”. -წერს ვაკო ავალიანი სოციალურ ქსელში.
აღნიშნულის გაგრძელებად, “მაესტროს” ახალი ამბების წამყვანმა, არხის ჟურნალისტების სახელით განცხადება გაავრცელა:
“ჩვენ ყოველთვის გვქონდა შეკითხვები არხზე გია გაჩეჩილაძის დაბრუნებასთან დაკავშირებით და დირექტორის წასვლამ კიდევ უფრო მეტი შეკითხვა გაგვიჩინა, თუნდაც, რა იგულისხმება პრიორიტეტების ცვლილებაში. ჩვენ “მაესტროს” გუნდს, ამ შეკითხვაზე პასუხი ჯერ არ გვაქვს. გვითხრეს მხოლოდ ის, რომ გია გაჩეჩლაძეს არხზე საკუთარი პროექტები მოაქვს და მას ახალი ამბების რედაქციასთან და მის პოლიტიკასთან შეხება არ ექნება.
ჟურნალისტები ველოდებით პასუხს კითხვებზე არხის მფლობელებისა და დამფუძნებლებისგან, მანამდე კი ვაგრძელებთ მუშაობას და გიყვებით ამბებს, ისე, როგორც აქამდე გიყვებოდით, “გაგიგეთ ამბავი მაესტროზე,” – ნათქვამია “მაესტროს” ჟურნალისტების განცხადებაში.