14 ივლისის გადაცემის “პრაიმშოუ” მთავარი განსახილველი თემა ძალადობას შეეხობოდა.
“პრაიმშოუს” წამყვანებმა TV -“პირველის” ოპერატორ ლექსო ლაშქარავას ოჯახსა და კოლეგებს სამძიმარი გამოუცხადეს.
ამასთან, ტელეკომპანია “იმედის” და “პრაიმშოუს” ერთობლივი გადაწყვეტილებით, სიძულვილის ენით მოსაუბრეებს ეთერ აღარ დაუთმობენ.
ასეთი იყო გადაცემის წამყვანების მონოლოგი:
ანრი ჯოხაძე: – “გადაცემა, რომელსაც დღეს იხილავთ დაახლოებით ერთი კვირის წინ ჩავწერეთ, სადაც ძალადობის გამომწვევ მიზეზებზე ვმსჯელობთ, თუმცა, ვერანაირად ვერ წარმოგვედგინა, რომ დღეს სამძიმრის თქმა მოგვიწევდა.
საბედნიეროდ, ჩვენს ქვეყანაში არის საზოგადოების ის უდიდესი ნაწილი, რომელიც ამ ყველაფრს გმობს და ემიჯნება. თუმცა, რატომღაც მოძალადეებს შეუძლიათ გარკვეული მეინსტირმიც აიღონ ხელში და ეს ნამდვილად სამწუხაროა.”
სალომე ღვინიაშვილი: – “პრაიმშოუს” სახელით ვუსამძიმრებ ლექსო ლაშქრავას ოჯახს და მის კოლეგებს ტელეკომპანია “პირველიდან”. გარდაცვალებამდე ერთი კვირით ადრე, ლექსოზე ფიზიკურად იძალადეს.”
ირაკლი მაქაცარია: “ტოლერანტობა, თანაგრძნობა და ჰუმანიზმი, ის, რითიც საუკუნეები ვამაყობდით, დღეს თითქოს ეჭვქვეშ დგება”
ნოე სულაბერიძე: – “ამასთან, გასათვალისწინებელია, რომ იძალადეს სამსახურეობრივი მოვალეობის შესრულების დროს. ის ერთ-ერთი იყო თავის 53 კოლეგიდან, რომელსაც თავს დაესხნენ. და ზოგადად განურჩევლად იმისა, რისგან შეიძლებოდა ლექსო დაღუპულიყო, 21-ე საუკუნეში, იქ სადაც ომებშიც კი, ჟურნალისტს ხელს არავინ ახლებს, ჩვენს ქვეყანაში, ჩვენს კოლეგებს, ჟურნალისტებს ჯერ თითის ქნევით ელაპარაკებიან და შემდეგ თავს ესხმიან. ძალადობა დაუშვებელია, ძალადობა დამღუპველია.
თუმცა, არ მგონია, რომ ირანად გადაქცევა გვემუქრებოდეს, ეს როგორც არ უნდა სურდეს რაღაც მციფრე ჯგუფებს. ამ შემთხვევაში მე ძალიან სწორად მიმაჩნია და მომწონს არხის პოზიცია იმასთან მიმართებაში, რომ არცერთი მოძალადე არ უნდა იყო ეთერში და დღეიდან, იმის გამო, რომ ასეთი ჯგუფების ტირაჟირება არ მოხდეს, რა თქმა უნდა, ჩვენი ერთობლივი გადაწყვეტილებით, მათ ტრიბუნა არ უნდა ჰქონდეთ. ”