პოლიტიკური მოძრაობა „დროა“-ს დამფუძნებელი ელენე ხოშტარია, “ფეისბუქის” პირად გვერდზე TV – “პირველის” გარდაცვლილი ოპერატორის ლექსო ლაშქარავას შესახებ წერს:
“ტვ1 -თან ღამე რომ ვიდექით უცებ გავიხედე და საავადმყოფოდან გამოსული, ლექსო დავინახე სოლიდარობისთვის მოსული. რაღაცნაირი პაციენტის ფორმა ეცვა ცისფერი. ძალიან ემოციური იყო მისი მოსვლა და ჟურნალისტების დახვედრა. მოშორებით ვიდექი და მომინდა მისვლა და რამე კარგის თქმა, მოფერება, მაგრამ რადგან არ ვიცნობდი, თან კამერები იყო, მომერიდა. დიდი ხანი ვუყურებდი და სიკეთეს ასხივებდა. ბევრი ვიყოყმანე და მორიდების გამო არ მივედი. რას წარმოვიდგენდი, რომ რამდენიმე დღეში მის გასვენებაში მომიწევსა წასვლა. ისეთი სიმწარე და სინანული გამყვა, კეთილი სიტყვის თქმა არასდროს არავისთან აღარ მომერიდება.” – წერს ხოშტარია სოციალურ ქსელში.
“ტვ პირველის” გარდაცვლილ ოპერატორს, ლექსო ლაშქარავა სახლის ეზოდან ტაშით გააცილეს. კოლეგებმა მისთვის საპატიო დერეფანი მოაწყვეს. ოპერატორებმა დაშვებული კამერებით გამოხატეს მწუხარება.
სხვადასხვა ტელევიზიების ოპერატორებმა „ტვ პირველის“ ოპერატორის სახლთან კამერის ნამსხვრევები მიიტანეს.
ლექსო ლაშქარავას დღეს დაკრძალავენ.
mix.metronome.ge გარდაცვლილი კოლეგის გამო მწუხარებას გამოთქვამს.