ტელეკომპანია “ფორმულა”-ს ჟურნალისტის რატი წვერავას თქმით, როცა მასზე ათობით ადამიანი ძალადობდა მეუფე იოანე გამრეკელი უყურებდა და აღნიშნულ ძალადობაზე რეაქცია არ ჰქონია.
ჟურნალისტი “ფორმულასთან” ეხმაურება მეუფის ბრალდებას, თითქოს ჩხუბი თავად რატი წვერავამ დაიწყო.
“თურმე მე მივიყენე ფიზიკური დაზიანებები სახეზე, სხეულზე, თავზე, მე შემოვიხიე პერანგი, იმიტომ, რომ სველი მქონდა – აი, ამ ვერსიას ავითარებს მეუფე იოანე გამრეკელი, თითქოს ის არაფერ შუაში არაა, რეალურად კი, ის იყო ადამიანი, რომელმაც ჩემზე განხორციელებულ ფიზიკურ ძალადობას ბიძგი მისცა და რატომ? – მე მასთან კითხვის დასასმელად მივედი და როდესაც დაინახა, რომ ათეულობით ადამიანმა ჩემზე ძალადობა დაიწყო, მას არაფერი გაუკეთებია და ეს ადამიანები არ შეუჩერებია. დარწმუნებული ვარ, სწორედ ამ ვერსიას განავითარებდნენ იქ მყოფი ადამიანები, რომ მე თითქოს ვიცემე ჩემი თავი, რომ არა ის კადრები, რაც გავრცელდა, სადაც ჩანს, როგორ ძალადობს რამდენიმე ათეული ადამიანი ჩემზე.
მეუფე აცხადებს, რომ თითქოს კიბეებიდან, სადაც თვითონ იმყოფებოდა, 100 მეტრის მერე მე დავიწყე ჩხუბი, რეალურად კი სწორედ იმ ადგილიდან, სადაც ის იყო, თაბუკაშვილის ქუჩამდე ჩემზე ფიზიკური ძალადობა არ გაჩერებულა. ათობით ადამიანი ჩემზე ფიზიკურად ძალადობდა და ერთადერთი მიზანი ჰქონდათ, რომ მოვეკალი. ამ ყველაფერს უყურებდა მეუფე იოანე გამრეკელი, თუმცა მას არანაირი რეაქცია არ ჰქონია, მან მისცა ბიძგი ჩემზე ფიზიკურ ძალადობას”, – განაცხადა დაზარალებულმა ჟურნალისტმა.
ცნობისთვის, რუსთაველის გამზირსა და მიმდებარე ტერიტორიებზე „თბილისი პრაიდის“ მოწინააღმდეგეებმა 5 ივლისს ჟურნალისტებისა და ოპერატორების მიმართ აგრესიული ქმედებები განახორციელეს, რის შედეგადაც სხვადასხვა მედიასაშუალების წარმომადგენლები დაშავდნენ.
გამოძიება სისხლის სამართლის კოდექსის 154-ე მუხლის მე-2, 156-ის მე-2 ნაწილის „ა“ და 225-ე მუხლის მე-2 ნაწილით მიმდინარეობს.
ოფიციალური ინფორმაციით, ჟურნალისტის პროფესიულ საქმიანობაში ძალადობის მუქარით უკანონოდ ხელის შეშლისა და ძალადობის ფაქტებზე სისხლის სამართლის წესით დაკავებულია შვიდი პირი.