ისრაელში, საქართველოს საელჩოში, საჰაერო დარტყმებისას, საქართველოს ერთი მოქალაქის დაჭრის შესახებ ინფორმაციას ადასტურებენ.
„ამ ეტაპზე, საქართველოს მხოლოდ ერთი მოქალაქის დაჭრის შესახებ შეგვიძლია ინფორმაციის დადასტურება“, – განუცხადეს „კურიერს“ საგარეო უწყებაში.
საელჩო დამატებითი ინფორმაციის ოფიციალური წყაროებით გადამოწმებას აგრძელებს.
ირანმა ისრაელის მიმართულებით 400-ზე მეტი რაკეტა გაუშვა. ისრაელის თავდაცვით ძალებში განაცხადეს, რომ ირანმა ისრაელის მიმართულებით 180 ბალისტიკური რაკეტა გაუშვა. როგორც ისრაელის არმიაში აღნიშნეს, საჰაერო თავდაცვამ რაკეტების დიდი ნაწილი გაანეიტრალა. თავის მხრივ, თელ-ავივი აცხადებს, რომ თეირანის თავდასხმას ისრაელის მხრიდან საპასუხო რეაქცია მოჰყვება.
განცხადება გაავრცელა “ისლამური რევოლუციის გუშაგთა” კორპუსმაც, სადაც ნათქვამია, რომ, ისრაელის საპასუხო ქმედებების შემთხვევაში, თეირანის რეაგირება უფრო გამანადგურებელი იქნება.
ბაიდენის ადმინისტრაციამ გაავრცელა განცხადება, რომლითაც შეერთებული შტატები ისრაელს სამხედრო დახმარებას ჰპირდება.
ირანის ისლამური რევოლუციის გუშაგთა კორპუსში განაცხადეს, რომ ისრაელის წინააღმდეგ სარაკეტო თავდასხმა „ჰეზბოლას“ ლიდერის, ჰასან ნასრალას მკვლელობის საპასუხოდ განხორციელდა.