დედაქალაქის ყოფილი მერი, “ევროპული საქართველოს” ყოფილი ლიდერი, გიგი უგულავა “ფეისბუქის” პირად გვერდზე იმ პირების ფოტოს აქვეყნებს, რომლებიც გუშინ 5 ივლისს ძალადობრივ და ჰომოფობიური ჯგუფების აქციაზე იმყოფებოდნენ. უგულავა სოციალურ ქსელში წერს:
“ზეიმობენ. ღმერთო შეუნდე, რამეთუ არა იციან რას იქმან”
პ.ს. სამაგიეროდ ღარიბაშვილმა და მოსაყდრე შიომ მშვენივრად უწყიან”
გუშინ, 5 ივლისს 17:00 საათზე თბილის პრაიდის კვირეულის ფარგლებში ღირსების მარში იყო დაგეგმილი. საპატრიარქოს მოწოდების შემდეგ, ძალადობრივი და ჰომოფობიური ჯგუფები ქაშუეთის ეკლესიასთან შეიკრიბნენ. ამის შემდეგ მათ პარლამენტთან გადაინაცვლეს, სადაც ოპოზიციის კარვები დაარბიეს. ამასთან, მოძრაობა “სირცხვილიასა” და “თბილისი პრაიდის” ოფისში შეიჭრნენ და დაარბიეს.
ძალადობრივი და ჰომოფობიური ჯგუფების სამიზნე გუშინ მედიის წარმომადგენლებიც გახდნენ. თავდასხმებს შედეგად 53 ჟურნალისტი დაშავდა. პოლიციამ მომხდარზე 8 პირი პროფესიულ საქმიანობაში ხელის შეშლისა და ძალადობის მუხლით დააკავა. მომხდარს გუშინვე გამოეხმაურნენ სხვადასხვა ქვეყნის საელჩოებიც. ერთობლივ განცხადებაში მათ ხელისუფლებას დამნაშავეების დასჯისკენ მოუწოდეს.