ლევან ზალკალიანმა, ცაგერის მუნიციპალიტეტის მერმა, თანამდებობა დატოვა. ცაგერის მუნიციპალიტეტის საკრებულოს რიგგარეშე სხდომაზე, რომელიც დღეს, 27 აგვისტოს, გაიმართა, დეპუტატებმა ცნობად მიიღეს ინფორმაცია მერის უფლებამოსილების შეწყვეტაზე.
„ცაგერის მუნიციპალიტეტის საკრებულო წარმატებებს უსურვებს ბატონ ლევან ზალკალიანს მომავალ საქმიანობაში“, – წერს საკრებულო.
მერის გადადგომის მიზეზი ამ დროისთვის უცნობია. „გაიგებთ სულ მალე“, – ასე უპასუხა ზალკალიანმა თანამდებობიდან წასვლის მიზეზების შესახებ ტელეკომპანია „ფორმულის“ მიერ დასმულ შეკითხვას.
ორი დღის წინ, 25 აგვისტოს, რაჭა-ლეჩხუმისა და ქვემო სვანეთის მხარეში იმყოფებოდა „ქართული ოცნების“ საპატიო თავმჯდომარე ბიძინა ივანიშვილი, რომელმაც ამბროლაურში მხარდამჭერებს სიტყვით მიმართა. უცნობია, უკავშირდება თუ არა ლევან ზალკალიანის გადადგომა მმართველი პარტიის მიერ რეგიონში გამართულ ღონისძიებას.
ზალკალიანი ცაგერის მუნიციპალიტეტის მერად 2023 წლის 29 აპრილის შუალედურ არჩევნებზე აირჩიეს „ქართული ოცნების“ რიგებიდან. ის ერთადერთი კანდიდატი იყო და შესაბამისად, ხმების 100% მიიღო.
შუალედური არჩევნები მას შემდეგ გაიმართა, რაც 2022 წლის 25 ნოემბერს ცაგერის მუნიციპალიტეტის მერის თანამდებობა დატოვა ვეტერანმა ფეხბურთელმა გიორგი ნემსაძემ.
მოგვიანებით ცნობილი გახდა, რომ კობახიძემ იმერეთის გუბერნატორად ცაგერის ყოფილი მერი დანიშნა