საკონსტიტუციო სასამართლოს თანამშრომელი, თორნიკე ობოლაშვილი, რომელმაც პოლიცია უფლებამოსილების გადამეტებასა და ფიზიკურ ძალადობაში დაადანაშაულა, სასამართლომ სამართალდამრღვევად ცნო და მას სიტყვიერი შენიშვნა გამოუცხადა. გადაწყვეტილება მოსამართლე მანუჩარ ცაცუამ რამდენიმე წუთის წინ მიიღო.
შეგახსენებთ, რომ თორნიკე ობოლაშვილმა პოლიციელთა მხრიდან ძალადობაზე სოციალურ ქსელში 17 ივლისს დაწერა. თორნიკე ობოლაშვილი დაწერა, რომ სამოქალაქო ფორმაში ჩაცმულმა ორმა სამართალდამცველმა 15 ივლისს, საღამოს საათებში საცხოვრებელ სახლთან ახლოს გააჩერეს და დოკუმენტაცია მოსთხოვეს, შემდეგ კი “ზედაპირულად” შეამოწმეს. მოქალაქის თქმით, მოსთხოვეს ჩანთის გახსნა, რაზეც უარი მიიღეს, ვინაიდან ეს უკვე ჩხრეკა იყო და საჭირო იყო სპეციალური ნებართვის წარდგენა. ამის შემდეგ, როგორც ობოლაშვილი წერს, პოლიცია მუქარაზე გადავიდა და პირადობას აღარ უბრუნებდნენ. მას შემდეგ კი, რაც მოქალაქემ ამ ყველაფრის გადაღება დაიწყო, სამოქალაქო ფორმიანმა პოლიციელებმა მას ტელეფონი წაართვეს და მანქანისკენ ძალის გამოყენებით წაიყვანეს, რა დროსაც მან ფიზიკური დაზიანებები მიიღო.