საფეხბურთო კლუბი Levante UD საქართველოში ტალანტების ძებნას იწყებს. სინჯები მომავალ კვირაში ჩატარდება. ინფორმაცია კლუბის ფეისბუქგვერდზე გამოქვეყნდა.
„თუ ფეხბურთი გიყვარს, ეს შანსი აუცილებლად უნდა გამოიყენო! ქოჩორას მხარდაჭერით, ხავი და ლევანტე საქართველოში მოდიან ახალი ტალანტების მოსაძებნად! გელოდებით ორშაბათს და სამშაბათს, 2006-დან 2011 წელს დაბადებულებს, რათა გვაჩვენო შენი შესაძლებლობები და მიიღო ლევანტეს სტიპენდია!“ – წერია კლუბის გვერდზე.
10 ბავშვი, რომელსაც ლევანტე აარჩევს, წაიყვანს ესპანეთში და 2 კვირის განმავლობაში ისინი ვალენსიური კლუბის საწვრთნელ პროცესში მიიღებენ მონაწილეობას, აკადემიაში იცხოვრებენ და პროფესიონალად ჩამოყალიბების გზაზე დიდ გამოცდილებას მიიღებენ. ვარჯიშები დიდ დიღომში, სფფ-ს საფეხბურთო ცენტრში გაიმართება.
