გადაცემაში კიდობანი ტელეწამყვანი გია გაჩეჩილაძე ჟურნალისტ ვახო სანაიაზე თავდასხმას კიდევ ერთხელ ეხმაურება და პროკურატურას მიმართავს. უცნობი სანაიაზე თავდასხმას “პატარა ინციდენტს” უწოდებს.
“ძალიან დიდი ხანია ამ თემაზე გადაცემა არ გამიკეთებია. თითქოს, ეს თემა უყურადღებოდ რჩება, რა თემაც მე ძალიან მაწუხებს, ეს არის დაჭერილი ბიჭების ამბავი. ინციდენტი რომ მოხდა წყნეთის ქუჩაზე. 19 რიცხვში იყო ამ ბიჭების სასამართლო. 30 რიცხვშია შემდეგი სასამართლო და მიყოლებითაა 10 რიცხვამდე ჩანიშნული სასამართლოები. მაინტერესებს, ამ პატარა ინციდენტის გამო, პროკურატურას მინდა ვკითხო, ჯერ არ დაგიხვრეტიათ ხო, ის ბიჭები? ეტყობა, ტელესივრციდან არ მოგსვლიათ კარნახისეული ჟურნალისტური ამბები, ხო, რომ ბიჭები დასახვრეტები არიან, თორემ შეიძლება აქამდე ეგეც ყოფილიყო, ხო?”, – განაცხადა უცნობმა.
შეგახსენებთ, ვახო სანაიასა და მის ოჯახს 25 თებერვალს, გვიან ღამით, თავს დაესხნენ. ჟურნალისტმა თავდასხმის შედეგად სხვადასხვა სახის დაზიანება მიიღო, დაშავდა მისი რძალიც. ჟურნალისტი დაზარალებულად 26 თებერვალს ცნეს. საქმეზე ბრალდებულ სამი პირს, სულიკო საყევარაშვილს, გიორგი სახელაშვილსა და ვაჟა გიგაურს მოსამართლემ პატიმრობა შეუფარდა.
მათ ბრალდება საქართველოს სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით, 151-ე მუხლის პირველი ნაწილით და 126-ე მუხლის პირველი ნაწილით წარედგინათ, რაც სასჯელის სახედ და ზომად 3 წლამდე თავისუფლების აღკვეთას ითვალისწინებს.